Timberlake hrækti á Svíana

Svíar eru með böggum hildar eftir skammarlega framkomu söngvarans Justin Timberlake í garð aðdáenda sinna þar í landi.

Timberlake hélt tónleika í Gautaborg í gærkvöldi en söngvarinn var eitthvað illa upplagður þegar hann kom til Gautaborgar á sunnudag eftir vel heppnaða tónleika í Kaupmannahöfn. Er hann kom á hótel sitt í Gautaborg biðu hans fjölmargir aðdáendur og svo fór að söngvarinn missti hreinlega stjórn á skapi sínu.

Aðdáendurnir höfðu hópast saman við anddyri hótelsins og smelltu af honum ljósmyndum í gríð og erg. Söngvaranum líkaði athyglin eitthvað illa og brást við með því að hrækja í átt að þeim sem voru að taka myndir. Einn aðdáendanna líkaði ekki þessi framkoma Timberlakes og kallaði til hans ókvæðisorðum sem ekki eru birtingarhæf. Timberlake svaraði að bragði og ausaði slíkum svívirðingum yfir aðdáandann að viðstaddir trúðu varla sínum eigin eyrum og augum.

„Þetta var með ólíkindum. Justin hefur alltaf virkað sem prúður piltur á mig í gegnum tíðina en nú veit ég að hann er hrokagikkur,“ sagði einn viðstaddra.

Koma Timberlake til Gautaborgar hefur eðlilega vakið mikla athygli og var hann eltur á röndum af bæði fjölmiðlum og aðdáenum þegar hann reyndi að skoða borgina í gær.

Timberlake reyndi að læðast út um bakdyr hótelsins sem hann dvelur á en það tók æsta aðdáendur aðeins nokkrar mínútur að hafa uppi á goðinu sínu. Hann flúði því aftur inn á hótelið skömmu síðar ásamt unnustu sinni Jessicu Biel, en hún fylgir manni sínum í tónleikaferðalaginu um Evrópu.