Borgin byggir leiguhúsnæði á lóð UMFÍ við Tryggvagötu

Reykjavíkurborg hefur leyst til sín lóð UMFÍ við Tryggvagötu. Greiðir félaginu 14 milljónir í útlagðan kostnað. Lóðin verður með í plönum um eflingu almenns leigumarkaðar. Starfshópur um húsnæðismál skipaður í gær.

Borgarráð samþykkti í gær að leysa til sín lóð Ungmennafélags Íslands (UMFÍ) við Tryggvagötu 13. Á sama fundi var samþykkt skipan starfshóps um húsnæðisstefnu Reykjavíkurborgar, en meðal annars á að efla almennan leigumarkað. Svo gæti því farið að leiguíbúðir yrðu reistar við Tryggvagötuna.

Dagur B. Eggertsson, formaður borgarráðs, segir lóðina vera mjög verðmæta og mikilvæga í uppbyggingu miðborgarinnar.

„Það sem við erum með í höndunum er lóð á besta stað í borginni. Nú munum við kalla eftir tillögum skipulagsráðs og skipulagssviðs um bestu nýtingu á lóðinni.“

Dagur er einnig formaður starfshópsins sem borgarráð skipaði varðandi húsnæðismál. Hann segir að hópurinn muni horfa til þessarar lóðar.

„Óneitanlega er þetta ein af lóðunum sem við höfum horft til til að efla almennan leigumarkað á Íslandi.“

UMFÍ fékk vilyrði fyrir lóðinni í borgarstjórnartíð Sjálfstæðisflokksins og Framsóknarflokksins og hugðist reisa höfuðstöðvar sínar þar. Fregnir bárust síðan af því að viðræður væru í gangi um byggingu hótels á lóðinni, en bæði Edduhótel og Icelandair-hótel voru nefnd til sögunnar. Ekki var sátt um hugmyndir um hótelbyggingu, enda hafði verið rætt um höfuðstöðvar UMFÍ á lóðinni.

Reykjavíkurborg greiðir UMFÍ 14 milljónir vegna útlagðs kostnaðar við hönnunar- og deiliskipulagsvinnu. Helga G. Guðjónsdóttir, formaður UMFÍ, segir félagið ganga sátt frá borði, en það hefur fest kaup á húsnæði undir höfuðstöðvar sínar.

„Við vorum orðin ákveðin í því að þetta væri góð lausn og erum bara sátt. Við keyptum húsnæði fyrir svolitlu síðan þar sem þetta mál dróst og dróst og við gátum ekki beðið endalaust.“

kolbeinn@frettabladid.is