Cruise í vanda

Þýsk yfirvöld hafa meinað Tom Cruise að taka upp senur í nýjustu kvikmynd hans á grundvelli trúarskoðana Cruise. Samstarfskona Cruise segir trúarbrögð leikarans ekkert hafa með myndina að gera.

Þýski varnarmálaráðherrann tilkynnti þetta nýverið og sagði að bannið væri eingöngu komið til vegna þess að Tom Cruise væri meðlimur í Vísindakirkjunni. Trúarbrögðin eru ekki viðurkennd í Þýskalandi og eru álitin óprúttið gróðafyrirtæki. Paula Wagner, nánasta samstarfskona Cruise, sagði að þetta væri algjört rugl hjá þýskum yfirvöldum enda myndu trúarviðhorf Cruise ekki endurspeglast á neinn hátt í myndinni. Málið er hins vegar nokkuð flókið þar sem efni kvikmyndarinnar er nokkuð eldfimt; Cruise leikur hershöfðingjann Claus von Stauffenberg en hann var einn þeirra sem skipulögðu tilræðið við Adolf Hitler árið 1944.

Þýska varnarmálaráðuneytið sendi frá sér yfirlýsingu nýverið þar sem fram kom að vissulega hefði herinn áhuga á sögulegum og sönnum sögum úr seinna stríði, bannið á Cruise væri alls ekki komið til vegna þessa. „Við teljum að þessi mynd fari langt með að minna umheiminn á að jafnvel meðal nasista ríkti uppreisnarandi gegn ráðandi öflum,“ sagði Wagner og bætti því að myndin yrði hálfgerður hetjuóður til þeirra sem reyndu að ráða Hitler af dögum. Vísindakirkjan hefur verið úthrópuð í Þýskalandi og eru kenningar hennar sagðar ógna lýðræðislegu frelsi. Forsvarsmenn Vísindakirkjunnar hafa mótmælt þeirri afstöðu þýskra stjórnvalda að kirkjan sé fjárplógsfyrirtæki eingöngu.

Fjölskylda hershöfðingjans sagði í samtali við þýska fjölmiðla að hún vonaðist til að Cruise léti Claus von Stauffenberg í friði og tilgreindi þar Vísindakirkjuna sem ástæðuna.