Sara reyndi sjálf við æfinguna sem hún hannaði fyrir Heimaleikana

Þrjár íslenskar CrossFit stjörnur hafa hannað æfingar fyrir Heimaleikana 2020 en tilgangur Heimaleikanna er að stuðla að almennu hreysti, gefa fólki markmið og styrkja gott málefni.

Þetta eru þau Þuríður Erla Helgadóttir, Björgvin Karl Guðmundsson og Ragnheiður Sara Sigmundsdóttir. Öll hafa þau endað ofarlega á heimsleikjunum, Sara og Björgvin hafa bæði komist tvisvar á verðlaunapall og Þuríður varð í níunda sæti í fyrra.

Sara hannaði æfingar númer fimm og sex. Það sem meira er að hún tók sig líka upp við að reyna við þær eins og sjá má hér fyrir neðan.

„Allar þessar mismunandi æfingar og keppnir sem fólk tekur þátt í frá heimili sínu gleðja mig. Það er gott fyrir samfélagið og gott fyrir sálina,“ skrifaði Sara á Instagram síðu sína.

„Núna er í gangi góðgerðkeppni á Íslandi sem heitir Heimaleikarnir. Ég, Þuríður Erla og Björgvin Karl vorum beðin um að hann tvær æfingar hver. Núna er búið að tilkynna allar sex,“ skrifaði Sara.

„Hér er önnur af æfingunum sem ég hannaði. Ég ákvað að prófa sjálf,“ skrifaði Sara en æfinguna má sjá hér fyrir ofan.

Heimaleikarnir er ætlað að stuðla að almennu hreysti og styrkja um leið Landspítalann í baráttunni gegn COVID-19 faraldrinum. Verðlaun verða veitt fyrir besta árangurinn en einnig fara allir þátttakendur í happdrættispott.

„Allir í samfélaginu okkar eru að leggja sitt af mörkum til þess að vinna gegn COVID-19 faraldrinum. Búið er að loka líkamsræktarstöðvum um allt land sem þýðir að allir þeir sem stunda líkamsrækt innandyra þurfa að grípa til annarra ráða. Á heimaleikunum keppa þátttakendur í hreysti heima hjá sér. Keppnin sjálf fer fram gegn um Internetið,“ segir í útskýringu á heimasíðu Heimaleikanna sem er að sjálfsögðu heimaleikarnir.is.