Aðgerðapakki upp á tæpa 26 milljarða afgreiddur í kvöld

Alþingi hyggst afgreiða sex mál sem tengjast aðgerðum ríkisstjórnarinnar vegna kórónuveirufaraldursins í kvöld. Ólíklegt þykir að breytingatillögur stjórnarandstöðunnar sem hljóða upp á 30 milljarða verði samþykktar. Aðgerðir ríkisstjórnarinnar í þeim pakka sem stendur til að afgreiða í dag hljóða upp á tæplega 26 milljarða að teknu tilliti til breytingatillagna sem gera ráð fyrir um 4,6 milljarða aukningu frá því sem gert var ráð fyrir í fyrstu umræðu.

Af þeim sex málum sem voru á dagskrá Alþingis í dag er einna fyrirferðarmestur bandormurinn svokallaði, frumvarp um ýmsar aðgerðir til að mæta efnahagslegum áhrifum í kjölfar kórónuveirufaraldursins, umræða um fjáraukalög 2020 og þingsályktun um sérstakt fjárfestingaátak.

Málin taka nokkrum breytingum frá því sem kynnt var við fyrstu umræðu í síðustu viku þar. Þar var gert ráð fyrir um 21,1 milljarði en við bætast hátt í 5 milljarðar samkvæmt breytingatillögum meirihluta fjárlaganefndar.

Þannig er gert ráð fyrir að hækka framlög til fjárfestinga um tæpa þrjá milljarða, einum milljarði til viðbótar verði veitt í heilbrigðiskerfið og þá er gert ráð fyrir fjármagni til að greiða öryrkjum tuttugu þúsund króna skattfrjálsa eingreiðslu í sumar. Þá er svigrúm til fyrirtækja til að fresta greiðslum opinberra skatta og gjalda aukið enn frekar svo fátt eitt sé nefnt en þá eru ótaldar þær aðgerðir sem þegar hafa verið samþykktar á borð við hlutabótaleiðina svokölluðu og lög um laun í sóttkví.

„Sumum finnst ekki nægilega langt gengið hér og mörgu get ég tekið undir í þeim efnum. Ég hins vegar segi það er alveg ljóst og það hefur öllum nefndarmönnum verið ljóst, að þetta er bara fyrsti leikhluti og ég veit ekki hversu leikhlutarnir verða margir þegar uppi er staðið,“ sagði Óli Björn Kárason, formaður efnahags- og viðskiptanefndar, er hann mælti fyrir nefndaráliti vegna bandormsins á Alþingi í dag.

Fimm flokkar stjórnarandstöðunnar lögðu í sameiningu fram breytingatillögur sem hljóða upp á þrjátíu milljarða til viðbótar við efnahagsaðgerðir ríkisstjórnarinnar. Samkvæmt þeim færi 9,1 milljarður til nýsköpunar og sprotafyrirtækja, 9 milljarðar í vegaframkvæmdir, 4,6 milljarðar í uppbyggingu fasteigna og aðrar fjárfestingar og 7,3 milljarðar til velferðarmála. 

„Þið ætlist til að við samþykkjum allt frá ykkur, og við gerum það eftir því sem ég best veit, af hverju samþykkið þið ekki eitthvað frá okkur,“ sagði Ágúst Ólafur Ágústsson, þingmaður Samfylkingarinnar, í umræðu um fjáraukalög og beindi orðum sínum til stjórnarmeirihlutans. Almennt virðist samstarf stjórnar- og stjórnarandstöðu hafa gengið vel við vinnslu þessara mála á Alþingi þótt skiptar skoðanir séu uppi um ýmis mál.

Atkvæðagreiðsla um málið hófst á Alþingi nú klukkan 19 og er hægt að horfa á hana í spilaranum hér að neðan eða á Alþingisvefnum.