Innlent

Kurr í sjúkra­flutninga­mönnum vegna for­gangs­röðunar í bólu­setningu

Kristín Ólafsdóttir skrifar
Magnús Smári Smárason, formaður Landssambands slökkviliðs- og sjúkraflutningamanna.
Magnús Smári Smárason, formaður Landssambands slökkviliðs- og sjúkraflutningamanna. Vísir/vilhelm

Formaður Landssambands slökkviliðs- og sjúkraflutningamanna segir kurr í félagsmönnum vegna forgangsröðunar í bólusetningu við kórónuveirunni. Sjúkraflutningamenn eru samkvæmt reglugerð heilbrigðisráðherra í fjórða forgangshóp en ættu „í fullkomnum heimi“ að vera í fyrsta eða öðrum, að mati formannsins.

Bólusetningar með bóluefni lyfjaframleiðandans Pfizer hófust á Íslandi í dag. Starfsmenn á gjörgæsludeild og bráðamóttöku fengu fyrstu sprauturnar og því næst var hafist handa við að bólusetja heimilismenn á hjúkrunarheimilum, auk annarra heilbrigðisstarfsmanna í framlínu.

Sinna veikum og slösuðum í allskyns aðstæðum

Sigurjón Bergsson sjúkraflutningamaður furðaði sig á því í færslu á Facebook í dag að sjúkraflutningamenn væru ekki flokkaðir sem framlínustétt í reglugerð heilbrigðisráðherra. Sjúkraflutningamenn, sem sinni bráðaþjónustu utan spítala, séu í fjórða flokki samkvæmt reglugerðinni. Hana má nálgast hér.

„Sjúkraflutningamenn eru að mínu viti framlínustarfsmenn. Við sinnum veikum og slösuðum í allskyns aðstæðum, oft á tíðum eru þær langt frá því að vera öruggar. Atvikin þar sem við erum boðuð í veikindi þar sem einkenni líkjast einkennum Covid-19 eru óteljandi síðastliðna mánuði,“ skrifaði Sigurjón, sem kvað stéttina ekki reikna með að fá bóluefni fyrr en mögulega í lok janúar – eða seinna.

„Við gefum fólki vökva, við tökum sýni og mælum lífsmörk og metum fólk og getu þess til að vera áfram heima í samráði við lækni. Þegar fólk er orðið of lasið til þess að vera heima, þá flytjum við sjúklinga á sjúkrahús, í bíl þar sem engan veginn er hægt að halda 2 metra bili. Ferðin yfir Hellisheiðina tekur í góðri færð um 40 mínútur. Við reynum eins og við getum að halda sóttvarnarbúnaðinum okkar heilum og góðum. Það getur þó verið erfitt í 10-25 metrum á sekúndu, þar sem búnaðurinn er viðkvæmur og ekki endilega ætlaður íslenskri veðráttu, þegar sinna þarf sjúklingum utandyra.“

Hæ ! Mig langar að kasta fram smá pælingum sem hafa brunnið á mér undanfarna daga og vikur... Þið ráðið hvað þið nennið...

Posted by Sigurjón Bergsson on Þriðjudagur, 29. desember 2020

Fleiri hafa furðað sig á þessari forgangsröðun á samfélagsmiðlum.

Magnús Smári Smárason formaður Landssambands slökkviliðs- og sjúkraflutningamanna sagði í viðtali í Reykjavík síðdegis í dag að hann hefði orðið var við kurr í félagsmönnum vegna forgangsröðunarinnar.

„Við erum í forgangshóp fjögur þannig að við erum nú ofarlega á lista en sá hópur er mjög fjölmennur og okkur hefur þótt ástæða til að benda á mikilvægi þess að starfsmenn sem starfa í bráðaþjónustu utan spítala séu mjög framarlega í þeim hópi í það minnsta,“ sagði Magnús.

„Í fullkomnum heimi ættum við að vera með starfsfólki bráðamóttökunnar. Þangað flytjum við flesta okkar sjúklinga og erum í mestri nánd við. Og í sama hópi og starfsfólk hjúkrunarheimila og dvalarheimila því þar eru hóparnir sem eru viðkvæmastir fyrir ef þeir veikjast.“ Umræddar stéttir eru í fyrsta og öðrum forgangshópi samkvæmt reglugerð.

Mikilvægt að tryggja að þau smiti ekki

Hann benti þó á að fyrstu áætlanir hefðu gert ráð fyrir að meira bóluefni kæmi til landsins um þetta leyti en raunin varð – og verður. Upphaflega hefði mátt gera ráð fyrir bólusetningu fyrir hópinn í lok desember eða byrjun janúar en nú væri engin dagsetning í hendi.

„Við erum búnir að senda fyrirspurn um stöðu mála af því að við höfum áhyggjur af þessu og okkar félagsmenn hafa áhyggjur af þessu, af því að okkar starfsstéttir eru sérstakar að því leyti að við erum að fara inn á mjög mörg heimili og sjúkrastofnanir og dvalarheimili þar sem eru einstaklingar í viðkvæmum hópum. Þess vegna er mjög mikilvægt að tryggja það með öllum leiðum að við séum ekki smitberar,“ sagði Magnús.

Þá kvaðst hann hafa fulla trú á því að svör berist frá ráðuneytinu. Hann teldi blasa við að breyta þurfi forgangslistanum eins og staðan er núna. 

„Allavega miðað við það ef tíðni eða magn bóluefnis verður miklu minna en lagt er upp með.“


Tengdar fréttir

Fór „eins hátt upp í Pfizer“ og hann gat og lagði inn beiðni

Forstjóri íslenska fyrirtækisins Controlant, sem kemur m.a. að dreifingu á bóluefni Pfizer við kórónuveirunni, kveðst hafa komið hugmyndum um Ísland sem rannsóknarverkefni á framfæri við Pfizer. Hann hafi fengið þau svör að beiðninni yrði komið áleiðis.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.