Sniglabandið í Gamla bíói verður í beinni á skjánum

Óskaband þjóðarinnar, Sniglabandið, fagnar 35 ára afmæli sínu um þessar mundir. Þeir kumpánar eru sífellt að prófa nýja hluti og ætla að kveðja þetta frábæra ár með bombu í beinni í kvöld. Leikin verða óskalög fyrir áhorfendur beint í beinu streymi úr Gamla bíói og er öllum frjálst að biðja um sín uppáhaldslög. Þeir sem ætla að biðja um óskalög þurfa að skrá sig inn á Zoom fund með því að smella hér.

Sniglabandið var stofnað árið 1985 og hefur frá upphafi verið í hópi athyglisverðustu hljómsveita landsins, sífellt á höttunum eftir því nýja og óvænta. Flestir ættu að muna eftir útvarpsþáttum þeirra þar sem allt var látið flakka. Nú verður allt í mynd, bæði þeir félagarnir, þeir sem hringja inn og þær óvæntu uppákomur sem Sniglabandið er þekkt fyrir.

Útsendingin verður öllum opin í streymi hér á Vísi og á Stöð 2 Vísi þriðjudaginn 29. des kl. 20.