Skipverji á Sigurði VE bitinn af hámeri

Birgir Olgeirsson skrifar 23. desember 2020 10:43

Talið var að hámerin væri dauð en svo reyndist ekki vera þegar ýta átti henni frá borði. Vísir/Getty

„Hann á að ná sér að fullu,“ segir Stefán Friðriksson, framkvæmdastjóri Ísfélagsins, um skipverja á uppsjávarskipinu Sigurði VE sem var bitinn af hámeri.

Greint var fyrst frá þessu atviki á vef 200 mílna á mbl.is.

Skipið var á veiðum á kolmunnamiðum suður af Færeyjum í lok nóvember. Hámeri kom upp með trollinu og virtist fiskurinn dauður. Skipverjinn ætlaði að koma honum fyrir borð en þá beit hámerin hann í vinstri höndina. Blæddi mikið úr skipverjanum og sködduðust vöðvar. Hann var fluttur á sjúkrahús í Þórshöfn í Færeyjum þar sem gert var að sárum skipverjans.

Sigurður VE er í eigu Ísfélagsins í Vestmannaeyjum en Stefán Friðriksson framkvæmdastjóri segir skipverjann ekki hafa verið í hættu á að missa handlegg eða putta, þó þetta hafi sannarlega litið illa út. Hann segir útgerðina hafa fengið þær fréttir að skipverjinn muni ná sér að fullu, en hann er þó enn óvinnufær.

Stefán segir þetta þó óalgengt.

„Hákarlategundir á þessu slóðum sækja ekki í fólk, og í þessu tilviki er einfaldlega verið að ýta fisknum frá borði og þá er glefsað í skipverjann,“ segir Stefán. Hámerin sleppti fljótlega takinu á skipverjanum.

Stefán segir margt gerast til sjós og sjómenn þurfi að hafa varann á þegar verið er að gera að afla.

Steinbítur og hlýri geti til að mynda bitið sig fasta þó það sé búið að slægja þá. „Menn þurfa að passa sig á svoleiðis kvikindum.“

Hámeri er oftast um 2 – 3 metrar á lengd og finnst bæði í vestan- og austanverðu N-Atlantshafinu.

Sjávarútvegur Vestmannaeyjar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.