Að sögn Pfizer hefur engum sendingum verið frestað. Öllum þeim 2,9 milljónum skömmtum sem bandarísk yfirvöld báðu um hafi verið komið á áfangastað en engar leiðbeiningar hafi borist um frekari dreifingu. Félagið sé sannfært um að það geti dreift 50 milljónum skammta á heimsvísu fyrir lok árs.

„Ég eins og aðrir var að velta þessu fyrir mér í gærkvöldi og ég sé ekki betur en að þessi tilkynning sé ætluð fyrir innanlandsmarkaðinn og dreifinguna í Bandaríkjunum. Við finnum út úr þessu í gær og verkefni dagsins er að tala við dreifingaraðilana og fá botn í málið fyrir Evrópu í dag,“ sagði Svandís í Bítinu í morgun. „Ég þrálas þessa yfirlýsingu og þetta virtist allt snúast um innanlandsmarkað í Bandaríkjunum.“

Svandís segir að samkvæmt yfirlýsingunni sé nægilegt magn af bóluefni hjá Pfizer sem hafi ekki farið út í dreifingu. Hver og einn sé með sína samninga og áætlanir. Hún telur of snemmt að segja til um hvort Ísland hafi átt að fara sjálfstætt í samningaviðræður í stað þess að fara í gegnum Evrópusambandið, en ljóst sé að samningsstaða sambandsins sé sterk.

„Með því að fara í gegnum Evrópusambandið erum við með mjög öflugt samningateymi þar gagnvart sex eða sjö framleiðendum. Þá erum við í raun og veru að tryggja okkur, litla Ísland, að við séum samhliða Evrópusambandinu í þeim samningaviðræðum og tryggjum í raun okkar aðkomu að öllu því sem Evrópusambandið fær,“ segir Svandís.

Fimm þúsund skammtar ekki vonbrigði 

Svandís segir ljóst að miðað við hraðann sem hefur verið á ferlinu geti vel verið að bólusetningar framlínustarfsfólks og viðkvæmra hópa geti hafist milli jóla og nýars. Nú þegar væri búið að gera ráðstafanir fyrir flutninga efnisins og þær fregnir sem bárust í gær hafi aðeins hliðrað ferlinu um nokkrar vikur.

Aðspurð hvort þeir fimm þúsund skammtar sem koma til landsins um jólin séu vonbrigði telur hún svo ekki vera. Fólk ætti að reyna að sýna þolinmæði og „anda í kviðinn“ þar sem mikið þrekvirki hefði nú þegar verið unnið.

„Ísland hefur verið að standa sig mjög vel í baráttunni við faraldurinn og við höfum líka passað mjög vel upp á það að vera með okkar hagsmuni mjög skýra og trygga varðandi bóluefnin. Það er sem er mikilvægast núna er að heiminum hefur tekist, með því að snúa bökum saman, bæði þessi fyrirtæki og þjóðir heims, að þróa bóluefni hraðar heldur en nokkurn tíma hefur gerst.“

Hún segist vona að frekari upplýsingar liggi fyrir í dag.

„Ég mun finna út úr þessu núna og svo verður umræða í þinginu í hádeginu. Ég vonast til þess að við verðum þá með skýrari svör, en mér finnst skipta miklu máli að við séum eins upplýst og hægt er.“