Innlent

„Ráðherra hefur ekki heimildir til að taka ákvarðanir um einstök mál“

Berghildur Erla Bernharðsdóttir skrifar
Áslaug Arna Sigurbjörnsdóttir dómsmálaráðherra. 
Áslaug Arna Sigurbjörnsdóttir dómsmálaráðherra.  Vísir/Vilhelm

Dómsmálaráðherra segist ekki hafa heimildir til að skipta sér af málefnum senegölsku fjölskyldunnar sem verður að óbreyttu vísað úr landi eftir sjö ára dvöl. Málið sé í höndum kærunefndar útlendingamála sem þurfi við ákvörðun sína að hafa hliðsjón af Barnasáttmála sameinuðu þjóðanna og laga um réttindi barna. Þingmaður Pirata segir óumdeilt, að barn sem fæðist hér og elst upp um árabil, sé Íslendingur.

Hjón frá Senegal sem hafa búið og starfað  hér á landi í tæp sjö ár hafa í sex ár án árangurs barist fyrir að fá atvinnuleyfi hér,dvalarleyfi  á grundvelli mannúðarsjónarmiða, óskað eftir alþjóðlegri vernd eða dvalarleyfi vegna sérstakra tengsla við landið. Landsréttur úrskurðaði nú síðast að  úrskurður Útlendingastofnunar og kærunefndar útlendingamála skuli standa. Hjónin hafa farið fram á endurskoðun ákvörðunarinnar. 

Kærunefnd útlendingamála ræður þessu

Áslaug Arna Sigurbjörnsdóttir dómsmálaráðherra hefur sagt að tíminn sem málið hefur tekið sé óboðlegur. Hún fékk afhentar 21.000 undirskriftir á föstudag þara sem skorað var á hana að beita sér í máli fjölskyldunnar.  Áslaug segist ekki hafa heimild til að beita sér í málinu. 

„Það er mikilvægt að fólk láti sig málið varða. Það er óboðlegt hvað málið hefur tekið langan tíma. Við höfum breytt mörgu til að svona gerist ekki, sett hafa verið ný heildarlög um útlendinga, málsmeðferðatími hefur verið styttur og það hafa verið gerðar ríkar kröfur á að mál séu kláruð á tilsettum tíma. Ég bendi á að málið er á borði kærunefnd útlendingamála sem er sjálfstæður úrskurðaraðili og dómsmálaráðherra tekur ekki ákvörðun í einstaka máli,“ segir Áslaug Arna. 

Aðspurð um hvort hún ætli að beita sér ef kærunefndin vísar senegölsku hjónunum aftur úr landi, ítrekar Áslaug:

„Ráðherra hefur ekki heimildir til að taka ákvarðanir um einstök mál. Hann getur skoðað kerfi eða reglur ef málið sýnir að það þurfi að gera slíkt. Þetta er afar langur tími og auðvitað hefur maður samúð með þessum einstaklingum. Það þarf að skoða af hverju svona gerist og hvort þetta geti gerst í fleiri tilvikum,“ segir Áslaug.

Þarf að taka tillit til Barnasáttmála Sameinuðu þjóðanna

Hjónin eiga tvær dætur þriggja og sex ára sem fæddust hér, tala íslensku og eru í leik-og grunnskólum. Aðspurð um hvort brottvísun hjónanna og þar með dætra þeirra væri ekki brot á Barnasáttmála Sameinuðu þjóðanna og lögum um réttindin barna hér á landi svarar Áslaug:

„Það þarf að líta  til þess sem þú nefnir þegar verið er að taka ákvarðanir um þessi mál sem fjalla um hagsmuni barna.  Þess vegna hef ég verið að vinna sérstaka skýrslu um hvað við getum gert betur fyrir börn á flótta. Þetta mál er hins vegar hjá kærunefnd útlendingamála sem þarf að líta til þessara þátta,“ segir Áslaug.

Áslaug sagði í fréttum að félagsmálaráðherra þyrfti að skoða mál þegar kemur að því að fólk utan EES fái tækifæri til að starfa hér. Félagsmálaráðherra sagði síðar í fréttum að hann hefði boðið dómsmálaráðherra samvinnu í málaflokknum. 

„Við höfum hafið samstarfið og það er mjög mikilvægt að skoða atvinnumálin þegar einstaklingar utan EES vilja koma og starfa hér. Það þarf að gera þeim það kleift.  Ég hef lagt áherslu á að breytingar verði gerðar á þessu enda erum við að sjá einstaklinga koma hingað á þeim grundvelli en eru ekki að leita af alþjóðlegri vernd,“ segir Áslaug Arna. 

Helgi Hrafn Gunnarsson þingmaður Pírata. Visir/Vilhelm

Helgi Hrafn Gunnarsson formaður þingflokks Pírata var spurður út í mál senegölsku fjölskyldunnar í Víglínunni í dag.

„Manneskja sem fæðist hér og elst hér upp fyrstu sex árin og hefur aldrei verið annars staðar, er Íslendingur. Ef lögin eru eitthvað ósammála um það þá hafa þau bara rangt fyrir sér. Það er mín afstaða. Auðvitað eigum við að breyta lögum til samræmis við þetta. Það þarf að auka möguleika fólks að vera hér löglega. Það þarf ekki að hleypa öllum inn en þetta þarf ekki að vera svona harðneskjulegt,“ segir Helgi Hrafn. 


Tengdar fréttir

Ráðherra segir biðtímann óboðlegan

Dómsmálaráðherra segir óboðlegt að fjölskyldan frá Senegal, sem vísa á úr landi, hafi beðið í sex ár eftir að fá niðurstöðu í máli sínu. Málið sýni mikilvægi þess að veita fólki utan EES atvinnuleyfi.

Hælisleitendur í rakaskemmdu húsnæði

Barnafjölskyldur sem hafa óskað eftir alþjóðlegri vernd búa í húsnæði á vegum Reykjavíkurborgar sem ungbarnaleikskóli flúði úr vegna rakaskemmda fyrir fjórum árum. Reykjavíkurborg segist vera búin að endurnýja húsnæðið. Víða sjást þó mygla og raki á húsnæðinu.

12 þúsund mót­mæla brott­vísun fjöl­skyldunnar

Rúmlega tólf þúsund manns hafa skrifað undir áskorun til Áslaugar Örnu Sigurbjörnsdóttur dómsmálaráðherra og ríkisstjórnarinnar þar sem krafist er að fjölskyldu frá Senegal verði ekki vísað úr landi.

„Réttindi barnanna eru fótum troðin í þessu fordæmalausa máli“

Hjónum frá Sénegal sem eiga þriggja og sex ára stelpur sem fæddust hér á landi verður að óbreyttu vísað úr landi. Þau hafa án árangurs barist fyrir dvalarleyfi hér af mannúðarástæðum eða fyrir alþjóðlegri vernd í sex ár. Lögmaður þeirra segir málið án fordæma.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.