Búið er að finna nýjan leikdag fyrir viðureign Íslands og Ítalíu í undankeppni EM U-21 árs landsliða karla í fótbolta.
Liðin áttu að mætast 9. október en leiknum var frestað vegna kórónuveirusmita í ítalska hópnum.
Nú er ljóst að leikurinn fer fram í Víkinni fimmtudaginn 12. nóvember klukkan 15:30.
Síðustu tveir leikir Íslands í undankeppninni eru á útivelli, gegn Írlandi sunnudaginn 15. nóvember og gegn Armeníu miðvikudaginn 18. nóvember.
Mikil spenna er í riðlinum en fjögur lið eiga möguleika á efsta sætinu: Ítalía, Írland, Svíþjóð og Ísland. Efsta lið hvers riðils í undankeppninni kemst beint á EM sem og þau fimm lið sem eru með bestan árangur í 2. sæti riðlanna.
Lokamótið fer fram í Ungverjalandi og Slóveníu á næsta ári.
