Erlent

Órói á ritstjórn götublaðs eftir umfjöllun um son Biden

Kjartan Kjartansson skrifar
New York Post er í eigu News Corporation, fjölmiðlaveldisins sem Rupert Murdoch byggði upp.
New York Post er í eigu News Corporation, fjölmiðlaveldisins sem Rupert Murdoch byggði upp. Vísir/Getty

Starfsmenn bandaríska götublaðsins New York Post eru sumir sagðir fullir efasemda um trúverðugleika gagna og heimildarmanna umfjöllunar þess um son Joe Biden, forsetaframbjóðanda demókrata, í síðustu viku. Blaðamaður sem skrifaði stóran hluta umfjöllunarinnar er sagður hafa neitað að skrifa sig fyrir greininni af þeim sökum.

Nokkrar deilur hafa staðið um hvernig samfélagsmiðlafyrirtæki brugðust við deilingum á frétt New York Post um Hunter Biden, son fyrrverandi varaforsetans, í síðustu viku. Í henni var gefið sterklega í skyn að Biden eldri hefði notfært sér embætti sitt sem varaforseti til þess að hjálpa syni sínum að auðgast á viðskiptum í Úkraínu. Facebook og Twitter takmörkuðu eða stöðvuðu deilingar á fréttinni vegna áhyggna af trúverðugleika hennar.

Donald Trump forseti og repúblikanar á þingi hafa hótað að grípa til aðgerða gegn samfélagsmiðlunum vegna þess sem þeir telja ritskoðun.

Bandaríska alríkislögreglan er sögð rannsaka hvort tölvupóstar sem frétt New York Post byggðist á gætu verið hluti af upplýsingahernaði rússneskra stjórnvalda í aðdraganda kosninga í næsta mánuði.

Nú segir New York Times frá því að Bruce Golding, blaðamaður við New York Post, hafi ekki viljað láta merkja sig fyrir fréttinni þrátt fyrir að hann hefði skrifað hana að mestu leyti. Hann hafi haft áhyggjur af trúverðugleika fréttarinnar.

Fréttin byggði á tölvupóstum og myndum sem eiga að hafa komið úr fartölvu Hunter Biden. Blaðamenn New York Post eru sagðir hafa efast um að blaðið hefði gert nóg til að staðfesta að gögnin væru ósvikin auk þess sem þeir settu spurningarmerki við trúverðugleika heimildarmanna og tímasetningu umfjöllunarinnar. Ritstjórar hafi beitt blaðamenn þrýstingi um að setja nafn sitt við fréttina.

Stephen Bannon, fyrrverandi aðalráðgjafi Donalds Trump Bandaríkjaforseta, sagði New York Post fyrst frá tilvist harðs disks með póstum Hunters Biden en það var svo Rudy Giuliani, persónulegur lögmaður forsetans, sem lét blaðinu „afrit“ af honum í té. Giuliani hefur ekki viljað leyfa öðrum fjölmiðlum að fara yfir frumgögnin. 

Hann segir New York Times að hann hafi valið Post vegna þess að „annað hvort hefði enginn annar tekið við honum eða ef þeir hefðu skoðað hann hefðu þeir eytt öllum tímanum í að hrekja hann áður en þeir birtu það“.

Bandaríska leyniþjónustan er sögð hafa varað Hvíta húsið við því í fyrra að útsendarar rússneskra stjórnvalda notfærðu sér Giuliani til að halda fölskum upplýsingum að Trump forseta.

Standa við fréttina

Heimildarmenn Times á ritstjórn Post segja að í það minnsta einn blaðamaður til viðbótar hafi neita að leggja nafn sitt við umfjöllunina um Biden-feðgana. Annar tveggja blaðamanna sem var skráður fyrir fréttinni er sagður hafa haft lítið sem ekkert með vinnslu fréttarinnar að gera. Hann hafi aðeins frétt af því að hann væri skráður fyrir fréttinni eftir að hún var birt.

Emma-Jo Morris, aðstoðarritstjóri stjórnmálaumfjöllunar New York Post, var einnig skrifuð fyrir fréttinni. Hún hafði aldrei áður verið skráð fyrir frétt en hún var aðstoðarframleiðandi sjónvarpsþáttar Sean Hannity, náins bandamanns Trump forseta, á Fox-sjónvarpsstöðinni, þar til í apríl. Á Instagram-síðu sinni birti hún myndir af sér með ýmsum úr nánasta hring Trump, þar á meðal Söruh Huckabee Sanders, fyrrverandi blaðafulltrúa Hvíta hússins, Bannon, og Roger Stone, vini Trump sem forsetinn náðaði fyrr á þessu ári.

New York Post segist standa við fréttina þó að aðrir fjölmiðlar hafi ekki getað staðfest efni hennar. Colin Allan, aðalritstjóri blaðsins, segir að æðstu stjórnendur þess hafi tekið ákvörðun um að birta fréttina eftir nokkurra daga vinnu við að ganga úr skugga um að hún ætti við rök að styðjast.


Tengdar fréttir

Twitter lokaði á reikning Trump-framboðsins tímabundið

Aðgangi framboðs Donalds Trump Bandaríkjaforseta á samfélagsmiðlinum Twitter var lokað tímabundið eftir að það deildi myndbandi um Joe Biden, mótframbjóðanda forsetans, sem stjórnendur Twitter töldu brjóta notendaskilmála miðilsins.

Facebook og Twitter skipta sér af vafasamri frétt um Biden

Samfélagsmiðlarisarnir Facebook og Twitter takmörkuðu deilingar á vafasamri frétt bandarísks götublaðs um Joe Biden, forsetaframbjóðanda Demókrataflokksins, í dag. Talsmaður Facebook segir miðilinn hægja á dreifingu fréttarinnar á meðan staðreyndavaktarar meti sannleiksgildi hennar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.