Strákarnir okkar stigu stórt skref í átt að sæti á EM í knattspyrnu næsta sumar með 2-1 sigri á Rúmenum í Laugardalnum í kvöld.
Gylfi Þór Sigurðsson skoraði bæði mörk Íslands í fyrri hálfleik en Rúmenar minnkuðu muninn í þeim seinni með marki úr umdeildri aukaspyrnu.
Gyfli Þór var valinn maður leiksins af íþróttadeild Vísis en íslenska liðið átti flottan leik. Yfirburðir liðsins voru meiri en lokatölurnar gefa til kynna.
Ítarlega umfjöllun um leikinn má lesa hér.
Ísland mætir Ungverjum í Búdapest 12. nóvember í hreinum úrslitaleik um sæti á EM. Ungverjar lögðu Búlgaríu 3-1 í Sófíu í kvöld.
Einkunnir leikmanna má sjá að neðan.
Hannes Þór Halldórsson, markvörður 6
Hafði ekkert að gera í fyrri hálfleik þegar Rúmenar hittu aldrei á markið og fram að vítaspyrnunni var rólegt í teig Íslendinga.
Guðlaugur Victor Pálsson, hægri bakvörður 8
Stimplaði sig af krafti inn í hægri bakvörðinn vitandi að Birkir Már Sævarsson gerði tilkall til stöðunnar líka. Ákveðinn í aðgerðum sínum, skynsamur og vel vakandi. Átti sprett leiksins í seinni hálfleik sem munaði litlu að leiddi til marks.
Kári Árnason, miðvörður 8
Kletturinn í vörninni. Yfirvegaður á boltanum, las leikinn vel og alltaf ógnandi í uppspili með sinni góðu spyrnugetu. Hættulegur í loftinu í innköstum og hornspyrnum Íslendinga. Nálægt því að skora í seinni hálfleik í einni slíkri.
Ragnar Sigurðsson, miðvörður 7
Traustur í vörninni og allt vellíðan þegar Raggi og Kári eru hlið við hlið í vörninni. Fékk dæmda á sig vítaspyrnu sem virðist hafa verið strangur dómur. Oftar en ekki fyrsti haus í boltann í teig Íslendinga eftir horn- og aukaspyrnur Rúmena. Heppinn að fá ekki dæmda á sig aðra vítaspyrnu seint í seinni hálfleiknum.
Hörður Björgvin Magnússon, vinstri bakvörður 7
Aðeins hægur af stað en óx ásmegin eftir því sem leið á leikinn. Minnti á sparkvissu sína í seinni hálfleik með tilraun af löngu færi.
Jóhann Berg Guðmundsson, hægri kantmaður 7
Mikill styrkur fyrir landsliðið að endurheimta kantmanninn úr meiðslum. Sást að hann er ekki orðinn alveg 100% og óskaði eftir skiptingu seint í síðari hálfleik. Færri sprettir en venjulega en við eigum þá inni. Skilaði sínu vel.
Aron Einar Gunnarsson, miðjumaður 8
Nærvera fyrirliðans skiptir miklu máli enda einstakur leiðtogi á vellinum. Skapar öryggi með nærveru sinni og drifkrafti. Innköstin sköpuðu sem fyrr hættu. Lét finna vel fyrir sér í návígum og öskrin hans á liðsfélaga heyrðust vel um allan völl. Staðsetur sig afar vel í varnarleiknum og henti oft hausnum fyrst í boltann þegar skipti máli.
Birkir Bjarnason, miðjumaður 7
Flott frammistaða á miðjunni hjá Birki sem líður vel við hlið Arons. Þeir ná vel saman. Yfirvegaður á boltanum, vildi fá hann og tók góðan þátt í uppspilinu.
Arnór Ingvi Traustason, vinstri kantmaður 7
Átti fínan leik á kantinum og heldur áfram að stimpla sig inn í byrjunarlið landsliðsins. Sinnti varnarvinnunni heilt yfir vel og komst í gott færi í seinni hálfleik þar sem hann hefði mátt leggja boltann á Alfreð sem var í betra færi.
Gylfi Þór Sigurðsson, framherji 9
Maður leiksins án nokkurs vafa. Gylfi gerir endurtekið gæfumuninn þegar á þarf að halda. Vann boltann eftir nokkrar sekúndur og gaf tóninn. Skoraði fyrra markið með einstaklingsframtaki og það síðara með frábæru skoti, bæði mörkin með vinstri fætinum - þeim veikari. Lykilmaður í pressunni með hlaupagetu sinni og ákefð.
Alfreð Finnbogason, framherji 7
Frábært að fá Alfreð aftur á fullt og framherjinn átti ágætan leik. Lagði upp seinna mark Gylfa með flottri sendingu. Kláraði sömuleiðis færi vel í marki sem dæmt var af.
Varamenn:
Kolbeinn Sigþórsson kom inn á fyrir Alfreð Finnbogason á 75. mínútu
Spilaði of lítið til að fá einkunn.
Rúnar Már Sigurjónsson kom inn á fyrir Jóhann Berg Guðmundsson á 83. mínútu
Spilaði of lítið til að fá einkunn.
Sverrir Ingi Ingason kom inn á fyrir á 86. mínútu
Spilaði of lítið til að fá einkunn.
