Nöfn þekktra Ís­lendinga á lista yfir þá sem mót­mæla hörðum sótt­varna­að­gerðum

Íslenskir læknar, áhrifafólk í atvinnulífinu og stjórnmálamenn eru á meðal þeirra sem hafa skrifað undir Great Barrington yfirlýsinguna (e. The Great Barrington Declaration) þar sem lönd heimsins eru hvött til þess að hverfa frá hörðum sóttvarnaaðgerðum og stefna frekar að því að vernda viðkvæma hópa á meðan frelsi annarra til athafna er að mestu óskert. Telja þau hertar sóttvarnaaðgerðir hafa alvarlegar afleiðingar í för með sér og neikvæð áhrif á andlega heilsu fólks.

Yfirlýsingin er sett fram af þeim Martin Kulldorff, prófessor í læknavísindum við Harvard-háskóla í Bandaríkjunum, Sunetra Gupta, farsóttarfræðingi með sérþekkingu á ónæmi og bóluefnaþróun og prófessor við Oxford-háskóla og Jay Bhattacharya, farsóttafræðingi, heilsuhagfræðingi og prófessor við Stanford-háskóla.

„Komandi bæði frá hægri og vinstri, og frá öllum hornum heimsins, höfum við öll unnið að því að vernda fólk. Núverandi sóttvarnaaðgerðir eru að hafa hræðileg áhrif á lýðheilsu, bæði til skemmri og lengri tíma litið,“ skrifa sérfræðingarnir í yfirlýsingu sinni.

Þau benda á að færri börn eru nú bólusett, færri krabbameinsskimanir eiga sér stað og andleg heilsa versni hratt. Þetta muni hafa þær afleiðingar í för með sér að dánartíðni hækki á komandi árum. Verkalýðsfólk og yngra fólk sé að taka versta skellinn. „Að meina nemendum að fara í skólann er alvarlegt óréttlæti.“

„Allar þjóðir munu ná hjarðónæmi“ 

Fram kemur í yfirlýsingunni að þekking á sjúkdómnum Covid-19 verði sífellt meiri og það sé vitað að dánartíðni hjá eldra fólki og fólki í áhættuhópum sé mun meiri en hjá yngra fólki. Þau telja að ef hjarðónæmi náist meðal þjóða heimsins minnki smithættan heilt yfir, líka hjá fólki í áhættuhópum.

„Við vitum að allar þjóðir munu á endanum ná hjarðónæmi - þ.e. tímapunkti þar sem fjöldi nýrra smita er stöðugur - og bóluefni getur þar hjálpað til en er ekki nauðsynlegt,“ segir í yfirlýsingunni. Að þeirra mati ætti því frekar að stefna að því að ná dánartíðni niður og takmarka samfélagslegan skaða þar til hjarðónæmi næst.

„Mannúðlegasta nálgunin […] er að leyfa þeim sem eiga minnst í hættu á að látast af völdum sjúkdómsins að lifa lífi sínu á sem eðlilegastan hátt til að byggja upp ónæmi gegn vírusnum í gegnum náttúrulegar smitleiðir, á meðan við verndum þá sem eru í áhættuhópum.“

Hjarðónæmi var á meðal þess sem rætt var á upplýsingafundi almannavarna í dag. Þar sagði Þórólfur Guðnason sóttvarnalæknir þjóðir heimsins vera langt frá því að ná hjarðónæmi. Honum þætti það jafnframt ótrúlegt að læknar héldu því fram að best sé að láta veiruna yfir sig ganga.

Læknar, stjórnmálamenn og fólk úr atvinnulífinu 

Samkvæmt tölum á vef yfirlýsingarinnar hafa yfir 125 þúsund einstaklingar skrifað undir listann sem almennir borgarar. Um níu þúsund læknar hafa skrifað undir og hátt í fimm þúsund vísindamenn á sviði læknisfræði og lýðheilsu, að því er fram kemur í tölfræði vefsins.

Þar má einnig finna Íslendinga sem hafa látið sig málið varða og skrifað undir ef marka má undirskriftalistann sem sjá má hér.

Augnlæknir, lýtalæknir og tannlæknir eru á meðal þeirra Íslendinga sem hafa skrifað undir. Þá má sjá þekkt nöfn úr atvinnulífinu, en á listanum eru nöfn Björgólfs Thors Björgólfssonar fjárfestis, Heiðars Guðjónssonar forstjóra Sýnar, Önnu Hrefnu Ingimundardóttur hagfræðings og forstöðumanns efnahagssviðs Samtaka atvinnulífsins, Þorsteins Víglundssonar forstjóra Hornsteins ehf. sem og Védísar Hervarar Árnadóttur miðlunarstjóra hjá SA.

Þá má einnig sjá nafn Sigmundar Davíðs Gunnlaugssonar, formanns Miðflokksins, en í samtali við Ríkisútvarpið segist hann ekki hafa skrifað undir listann sjálfur. Hann hafi ekki einu sinni vitað af tilvist listans. 

Bæði Heiðar Guðjónsson og Anna Hrefna Ingimundardóttir staðfesta við fréttastofu að þau hafi skrifað undir listann. Þá hefur Þorsteinn Víglundsson talað fyrir því að efnahagslegar afleiðingar aðgerðanna verði metnar og óttaðist hann langvarandi efnahagslegar afleiðingar.

Þá hafa fjölmargir fræðimenn á sviði læknisfræði og heilbrigðismála einnig skrifað undir líkt og sjá má á heimasíðunni. Hér að neðan má sjá myndbönd sem gefin voru út samhliða yfirlýsingunni.

Athugasemd ritstjórnar 23:20: Eftir að íslenskir fjölmiðlar greindu frá listanum virðast enn fleiri undirskriftir hafa bæst í hópinn. Sumar hverjar frá aðilum sem telja má ljóst að hafi alls ekki skrifað undir. Þannig mátti um tíma sjá nafn Þórólfs Guðnasonar sóttvarnalæknis á listanum, sem og nafn Kára Stefánssonar, forstjóra Íslenskrar erfðagreiningar, sem hefur talað fyrir hertum aðgerðum innanlands. Þau nöfn hafa þó verið fjarlægð.