Íslenski boltinn

Leiknir niður­lægði Leikni | Magni neitar að leggja árar í bát

Runólfur Trausti Þórhallsson skrifar
Leiknismenn [frá Reykjavík] gátu leyft sér að fagna í kvöld er liðið skoraði sjö sinnum.
Leiknismenn [frá Reykjavík] gátu leyft sér að fagna í kvöld er liðið skoraði sjö sinnum. Vísir/Twitter-síða Leiknis R.

Leiknir Reykjavík vann ótrúlegan 0-7 sigur gegn Leikni Fáskrúðsfirði á útivelli í Lengjudeildinni. Þá er Magni Grenivík enn á lífi eftir sigur gegn Þrótti Reykjavík.

Leiknir Reykjavík er í harðri baráttu um að komast upp í Pepsi Max deildina á meðan Leiknir Fáskrúðsfjörður er að berjast við að halda sæti sínu í deildinni. Það var ljóst frá fyrstu mínútu hvort liðið færi með sigur af hólmi í dag en Leiknismenn frá Reykjavík unnu 7-0 sigur.

Sólon Breki Leifsson kom þeim á bragðið snemma leiks en hann skoraði þrívegis í dag. Staðan í hálfleik var 5-0 og áttu heimamenn aldrei viðreisnar von. Ásamt Sóloni þá skoraði Sævar Atli Magnússon tvívegis á meðan þeir Máni Austmann Hilmarsson og Birkir Björnsson skoruðu sitthvort markið.

Í Laugardalnum voru tvö lið að mætast sem eru í harðri baráttu við Leikni F. um sæti í Lengjudeildinni að ári. Á síðustu leiktíð töpuðu Magni Grenivík 7-0 á gervigrasvelli Þróttar en annað var upp á teningnum í kvöld.

Davíð Bjarnason kom Magna yfir strax á 1. mínútu leiksins og reyndist það eina mark kvöldsins í Laugardalnum. Gunnlaugur Birgisson nældi sér í rautt spjald í síðari hálfleik og Þróttur lék síðasta hálftímann manni færri.

Leiknum lauk með 1-0 sigri Magna sem þýðir að Þróttur er ekki í fallsæti þökk sé markatölu. Þróttur er með -23 í markatölu, Magni -24 og Leiknir F. -27.

Öll liðin eru með 12 stig og ljóst að fallbarátta Lengjudeildarinnar gæti vart verið opnari.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.