Ræddu skot Óskars Hrafns á Ágúst

Í Pepsi Max stúkunni í gær ræddu þeir Hjörvar Hafliðason og Sigurvin Ólafsson um ummæli Óskars Hrafns Þorvaldssonar, þjálfara Breiðabliks, í viðtali við mbl.is, eftir tapið fyrir KR, 0-2, á mánudaginn.

Þar virtist Óskar skjóta á forvera sinn í starfi þjálfara Breiðabliks, Ágúst Gylfason. „Við höf­um tekið mikl­um fram­förum á ákveðnum sviðum en liðið hef­ur hafnað í öðru sæti deild­ar­inn­ar und­an­far­in tvö ár og kraf­an er og verður alltaf að gera bet­ur. Það er hægt að velta því fyr­ir sér hversu mik­il inni­stæða var fyr­ir þeim ár­angri en svona er heim­ur­inn sem við lif­um í. Við erum á ákveðinni veg­ferð en eins og þetta kem­ur mér fyr­ir sjón­ir tek­ur þetta of lang­an tíma og við þurf­um að reyna hraða þessu ferli,“ sagði Óskar.

Hjörvar hnaut aðeins um það þegar Óskar efaðist um innistæðuna fyrir árangri Breiðabliks tímabilin 2018 og 2019.

„Þetta er í fyrsta sinn sem ég er ósammála Óskari frá því tímabilið hófst. Þarna segist hann ekki vera viss um innistæðuna fyrir því sem Ágúst gerði. Ágúst tók við liði Breiðabliks sem lenti í 6. sæti 2016 og 2017 og skilaði þeim í 2. sæti tvö ár í röð og í bikarúrslit, skoraði flest mörk í fyrra og seldi fullt af leikmönnum,“ sagði Hjörvar í Pepsi Max stúkunni í gær.

„Mér finnst þetta skrítið því ég hef heyrt Óskar vera jákvæðan í garð þess sem Ágúst skildi eftir sig. Þetta kom mér svolítið á óvart. Það má ekki gera lítið úr því að Ágúst sýndi mikinn stöðugleika með Breiðablik. Nú eru þeir að fara í nýjar áttir og prófa öðruvísi tegund af fótbolta. Það var vitað að þetta yrði einhvers staðar erfitt á leiðinni og akkúrat núna er þetta pínu erfitt.“

Strákarnir í Pepsi Max stúkunni báru svo saman árangur Breiðabliks gegn bestu liðum landsins í ár og í fyrra. Óhætt er að segja að samanburðurinn sé Blikaliðinu í fyrra í hag.

„Það sem vekur mestan áhuga hjá mér er fyrirsögnin þar sem hann talar um að bomba hausnum endalaust við steininn. Úr því mætti lesa að menn ættu kannski að skipta um kúrs og hvort þetta sé vonlaust verkefni. Það gefur því undir fótinn,“ sagði Sigurvin.

„Svo kemur það sem Hjörvar var að tala um áðan, sem er eins og pilla í garð fyrrverandi þjálfara og hans aðferð hafi skilað þeim einhverjum stigum en mér finnst hann vera að gefa í skyn að það hafi ekki verið nein framtíð í því.“

Breiðablik er í 5. sæti Pepsi Max-deildar karla með 23 stig. Næsti leikur liðsins er gegn Stjörnunni á Kópavogsvelli annað kvöld.