Innlent

„Ég verð skugginn þinn þangað til þú hengir þig“

Kolbeinn Tumi Daðason skrifar
Frá bænum Mehamn, norðarlega í Noregi.
Frá bænum Mehamn, norðarlega í Noregi. Getty

Gunnar Jóhann Gunnarsson segir að sér hafi ekki dottið í hug að nota neitt annað en haglabyssu til að hræða hálfbróður sinn Gísla Þór Þórarinsson. Edel Olsen, réttargæslumaður íslenskra aðstandenda Gísla, spurðist fyrir um þetta í dómsal í dag.

Réttarhöld í máli Gunnars Jóhanns, sem ákærður er fyrir að hafa skotið hálfbróður sinn, Gísla Þór Þórarinsson, til bana í norska bænum Mehamn í apríl á síðasta ári, héldu áfram í Héraðsdómi Austur-Finnmerkur í Vadsø í morgun.

Fram hefur komið að Gunnar Jóhann var reiður bróður sínum Gísla sem hafði tekið upp samband við barnsmóður Gunnars Jóhanns. Gunnar Jóhann segir skot hafa hlaupið úr haglabyssu fyrir slysni sem hafi banað Gísla.

Norski staðarmiðillinn iFinnmark fylgist grannt með gangi mála í dómsal.

Ætti engan möguleika í slag

„Ég var með vasahníf á mér þegar ég var handtekinn. Hugmyndin að nota haglabyssu til að hræða hann kom bara til mín. Haglabyssan átti að lýsa alvarleika málsins,“ sagði Gunnar Jóhann.

Gísli Þór Þórarinsson bjó í Mehamn líkt og hálfbróðirinn, Gunnar Jóhann.

Olsen sagði Elenu Underland, barnsmóður Gunnars Jóhanns og kærustu Gísla heitins, telja að hann ætti engan möguleika í slagsmál gegn Gísla Þór. Spurði Olsen hvort það væri ástæða þess að hann mætti til Gísla vopnaður haglabyssu.

„Meðal annars þess vegna. Ég vildi hræða Gísla.“

Heilinn sendi höndinni ekki skilaboð

Mette Yvonne Larsen, sem gætir hagsmuna Elenu Undeland, kærustu Gísla heitins og barnsmóður Gunnars Jóhanns, spurði Gunnar Jóhann hvort hann notaði sjálfsvígshótanir sem tól til að fá vilja sínum fram.

„Ég hef enga stjórn á sjálfum mér, en ég fæ fólk ekkert til að gera það sem ég vil - þótt það líti kannski þannig út,“ sagði Gunnar.

Larsen spurði þvínæst hvernig hann gæti verið svo viss um að hann hefði ekki skotið af byssunni fyrst að hann var með fingurinn á gikknum.

„Heilinn sendi höndinni aldrei skilaboð um að ýta á gikkinn. Þetta var eins og bílslys. Þetta gerðist bara.“

Að drepa eða berja

Larsen vísaði svo til samtala sem Gunnar hafði átt í viðurvist fólks þar sem hann hafði sagst ætla að drepa Gísla. Hann gæti þó ekki gert það heima hjá barnsmóður sinni eða nærri börnunum.

Gunnar Jóhann við veiðar.Facebook

„Allir vita hvað ég sagði. Ég hef aldrei farið í felur með það. En ég myndi aldrei gera svona,“ sagði Gunnar.

Björn Andre Gulstad, verjandi Gunnars, spurði hann út í orðanotkun hans. Að drepa.

„Þegar ég notaði orðið „drepa“ þá var það til að lýsa því að ég ætlaði að berja Gísla,“ sagði Gunnar.

Hætti við að pósta myndum af Gísla

Nokkur skilaboð sem Gunnar hafði sent Gísla voru birt í dómsal. Á meðal þeirra voru skilaboð send 17. apríl eða viku fyrir dauða Gísla.

„Ég verð skugginn þinn þangað til þú hengir þig,“ voru á meðal skilaboðanna. Þeim fylgdu mynd af hundi að tyggja rottu.

Myndinni fylgdi texti þar sem kom fram að maður gæti ekki treyst neinum á erfiðum stundum. Jafnvel bróðir manns geti verið rotta.

Þá fundust ýmsar myndir á síma Gunnars af Gísla. Meðal annars frá skírn yngsta barns Gísla.

„Myndirnar voru eins og í bandarískri bíómynd. Ég vildi bara niðurlægja hann. Ég hafði hugsað mér að dreifa myndunum en stoppaði mig. Þótt ég væri reiður þá áttaði ég mig á því að það væri of mikið að fara að pósta þessum myndum.“


Tengdar fréttir

„Annar okkar mun ekki lifa af“

Lögreglan í Finnmörk var hvorki talin hafa gert alvarleg mistök né hafa brotið gegn skyldu sinni til þess að afstýra refsiverðu broti í aðdraganda þess að Gunnar Jóhann Gunnarsson skaut hálfbróður sinn til bana í smábænum Mehamn í Noregi í apríl í fyrra.

Réttarhöld hefjast yfir Gunnari Jóhanni

Réttarhöld hefjast í Noregi í dag yfir 37 ára gömlum íslenskum manni, Gunnari Jóhanni Gunnarssyni, sem ákærður er fyrir að hafa af ásetningi skotið hálfbróður sinn, Gísla Þór Þórarinsson, til bana í norska smábænum Mehamn í apríl í fyrra.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.