Fastur á sex stjörnu lúxus­skemmti­ferða­skipi vegna veirunnar

Magnús Gylfason knattspyrnuþjálfari með meiru kom heim til Íslands ásamt eiginkonu sinni við illan leik. Rétt slapp fyrir horn vegna óveðursins en áður höfðu þau hjón og fleiri verið föst á skemmtiferðaskipi sem hvergi fékk að koma í land vegna ótta við að smit væri um borð. Til stóð að vera fimm nætur um borð en þær urðu 10.

Rætt var við Magnús í Bítinu í morgun þar sem hann sagði sögu sína og af ævintýrum um borð í skemmtiferðaskipinu Crystal Symphony.

Úr einni höfn í aðra

„Í grófum dráttum var þetta þannig að við fórum í lúxussiglingu, því bróðir minn var sextugur og flugum alla leið til Guam í Kyrrahafinu og ætluðu að vera þar um borð í sex daga, fimm nætur, á lúxusskipi og fara í land í Manilla. En út af þessari Corona-veiru þá var Filippseyjar og Manilla búið að loka höfninni fyrir skemmtiferðaskip.“

Magnús segir það hafa verið vegna þess að upp komu smit í einhverjum skipum og yfirvöld í Manilla vildu ekki sjá að fá neina slíka í land.

„Þá voru góð ráð dýr. Skipafélagið ákvað að sigla skipinu til Vietnam. En, á leiðinni þangað, þegar búið var að sigla í um sólarhring, þá kom upp sama staða þar. Þeir vildu ekki fá skip að landi, eða ekki okkar skip, veit ekki hvort það var lokað á öll skip, því það höfðu einhverjir komið um borð í skipið okkar farþegar sem höfðu farið í gegnum Hong Kong í Kína. Og það var nóg til að Víetnam vildi ekki hleypa okkur í land.“

Var þá stefnan sett á Singapore.

„Það var bara fjögurra daga sigling. Og var auðvitað mikil óvissa um það allan tímann hvort við fengjum að fara í land þar. Því það voru fréttir um það í öllum fjölmiðlum að það væri komið upp þó nokkuð smit þar.“

Mældur tvisvar á dag og athugaður

En, það varð þó úr að farþegar fengu að fara í land þar.

„Það var gríðarlega mikið eftirlit í skipinu. Við þurftum að hitamæla okkur tvisvar á dag; mæta og stimpla sig inn með kortinu sínu. Fara í hitamælingu fyrir hádegi og eftir hádegi alla daga eftir að þetta kom upp. Það reyndist sem betur fer ekkert smit í okkar skipi. Aldrei nein vandamál. En það var þó þetta að það þurfti að margbóka flug þvers og kruss og óþægilegt meðan óvissan var en lúxusinn var mikill í skipinu og það reddaði þessu.“

Magnús játar því að ánægjulegt hafi verið að fá fast land undir fætur. Því hafi vissulega fylgt ónotatilfinning að hrökklast úr einni höfn í aðra og frétta af smiti.

„En það væsti ekki um okkur. Var ekkert smit um borð og þá var byrjað að ræða hvort sigla ætti til Ástralíu. Vissi ekki hvaðan á mig stóð veðrið. Fréttirnar voru þannig að Asía væri að lokast og manni leið ekkert vel með það.“

Stanslaus skemmtiatriði og maturinn frábær

Spurður segir Magnús það ekki hafa verið svo að fólk um borð hafi verið með grímur af ótta við smit.

„Nei, en samt. Ef einhver hóstaði þá fór um mannskapinn.

Ég var að spila bridge í einum salnum og einhver hóstandi, með einhverja flensu, og jú, þá var panikk.

Nei, menn voru ekki með grímur en á leiðinni heim voru allir með grímur og hitamælingar.“

Veiran lengdi ferðina talsvert verulega í annan endann. Þau voru tíu daga um borð og fengum aldrei að fara í land. Og það var farið að taka á taugina.

„En, þetta var sex stjörnu skip, rosalega flottur aðbúnaðar, stanslaus skemmtiatriði og maturinn frábær. Alveg geggjað en ég var orðinn ansi pirraður þar til ég sætti mig við stöðuna,“ segir Magnús í samtali við Vísi.

Magnús segir að þessi „bónus“ hafi verið sér að kostnaðarlausu en það stóð tæpt með flug til Íslands vegna óveðursins. En nánar verður rætt við Magnús í kvöldfréttum Stöðvar 2 í kvöld.