Býst við að flensan fari á flug á næstu vikum en bóluefnið búið

Flensutilfellum fer hægt og sígandi fjölgandi og býst sóttvarnalæknir við því að flensan nái hámarki um miðjan febrúar. Hann telur ekki ástæðu til að ætla að flensan verði skæðari í ár en fyrri ár. Bóluefni gegn inflúensu er uppurið í landinu.

Þrír voru lagðir inn á sjúkrahús með inflúensu í desember, þar af tveir fullorðnir um áttrætt og eitt barn, að því er kom fram í tilkynningu á vef embættis landlæknis um flensusmit á föstudag. Frá því í byrjun október hafi inflúensusmit verið staðfest hjá áttatíu einstaklingum og þeim fjölgi sem eru með inflúensulík einkenni.

Þórólfur Guðnason, sóttvarnalæknir, segir við Vísi að flensan sé hægt og sígandi á uppleið og búast megi við að hún fari á flug á næstu vikum. Flensan sé mismunandi skæð á milli ára en ekkert bendi séstaklega til þess að hún verði skeinuhættari í ár en undanfarin ár.

„Það á eftir að koma í ljós þegar hún fer á flug,“ segir hann.

Vaxandi spurn eftir bóluefni

Líkt og undanfarin ár kláraðist inflúensubóluefni á landinu fyrir áramót. Þórólfur segir að um 70.000 skammtar hafi komið til landsins í september og þeim hafi verið strax dreift um landið.

„Það er reyndar eitthvað bóluefni sem Landspítalinn hefur pantað sérstaklega fyrir sína sjúklinga en ég held að það sé óhætt að segja allt annað bóluefni er búið. Það kunna að leynast einstaka skammtar á einstaka heilsugæslustöðvum. Það er mögulegt en það er eitthvað sáralítið,“ segir Þórólfur.

Bólusetningar hafi verið vel auglýstar í haust en embættið mælir með bólusetningum fyrir áhættuhópa og heilbrigðisstarfsmenn en ekki allan almenning. Ljóst sé þó að margt heilbrigt fólk og vinnustaðir hafi farið í bólusetningu í haust og notað hluta af þeim skömmtum af bóluefninu sem komu til landsins.

Þórólfur segir að spurn eftir bóluefni hafi farið vaxandi á undanförnum árum en embættið kunni ekki sérstakar skýringar á því.

„Fyrir nokkrum árum vorum við bara með um 60.000 skammta og þurftum stundum að henda afgangi sem gekk ekki út. Það er ekki svo nú,“ segir hann.