Menning

Sendi innanhúspóst Forlagsmanna óvart til Siglfirðingsins

Jakob Bjarnar skrifar
Páll Baldvin og Egill fara frjálslega með heimildir að mati Jóns Ólafs. Hann er til í að fyrirgefa Agli en hvað varðar Forlagsmenn þá séu þeir svo merkilegir með sig að það bæði rignir upp í nef þeirra og afturenda í senn.
Páll Baldvin og Egill fara frjálslega með heimildir að mati Jóns Ólafs. Hann er til í að fyrirgefa Agli en hvað varðar Forlagsmenn þá séu þeir svo merkilegir með sig að það bæði rignir upp í nef þeirra og afturenda í senn.

Jón Ólafur Björgvinsson, sem búsettur er úti í Svíþjóð en á ættir að rekja til Siglufjarðar, telur sig grátt leikinn af Páli Baldvin Baldvinssyni og þeim Forlagsmönnum Agli Erni Jóhannssyni framkvæmdastjóra og Bjarna Guðmarssyni ritstjóra. Jón Ólafur telur ónákvæmni hafa gætt í heimildavinnu og sumt í stórvirki Páls Baldvins sem svo hefur verið nefnt, sé hreinlega tekið ófrjálsri hendi án þess að heimilda sé getið. Jón Ólafur segir svo vera um eitt og annað sem hann sjálfur hefur áður tekið saman og birt á vefsíðunni siglo.is – efni sem hann hefur haft mikið fyrir að finna og skrásetja.



Jón Ólafur skrifaði Forlaginu og óskaði svara vegna þessa en lengi vel létu þeir ekki svo lítið að svara honum. Þá sendi Jón þeim þar grein sem hann hugðist birta, og birti reyndar, en gaf þeim áður kost á að bregðast við. Að sögn Jóns Ólafs svaraði Páll þá en óvart fylgdu með tölvupóstssamskipti Páls, Egils og Bjarna og þar var farið hinum háðulegustu orðum um Jón Ólaf.

Jón Ólafur segist ekki vera að rekast í þessu máli af því að hann vilji hafa eitthvað uppúr því. Hann vill bara að menn umgangist heimildir sómasamlega og höfundaréttur sé virtur.Kristín Sigurjóns

„Það fylgdi með allur þráðurinn, samskipti Egils Arnar og Bjarna Guðmarssonar. Eins og þeir haldi að ég sé einhver hálfviti. Var ég þó búinn að vera meira en til í að tala við þá en þarna var ég búinn að gefast upp á þeim,“ segir Jón Ólafur í samtali við Vísi.

Slysapóstur frá Páli

Hann fer nánar yfir þetta klúður á Facebooksíðu sinni.



„Heldur ekki að Páll greyið þegar að hann loksins nennti að svara mér í miklum pirrings tón eftir hádegi á föstudag að hann hafi ekki bara óvart sent mér allan tölvupósta þráðinn,“ skrifar Jón Ólafur í sérstöku svari til Hrafnhildar Theodórsdóttur sem vildi benda á að Páll Baldvin væri hinn vandaðasti maður. Jón Ólafur á erfitt með að koma auga á það í ljósi þess sem á undan er gengið.

„ÚPS ! sem hafði farið á milli manna hjá á forlaginu með viðbjóðslegum staðhæfingum um mig sem staðfestir að þeir voru sko ekkert að taka þetta sérstaklega alvarlega og þar er augljóst að þessi amatör er þeim bara til vandræða..... og leiðinda hmm.



Ég svara þeim og Páli strax þrátt fyrir að vera í algjöru sjokki yfir því sem ég fékk staðfest í þessu slysa pósti frá Páli.



Síðan kom annar SÉR póstur frá Páli seint á föstudaginn og það er enn og aftur þessi leiðinda tónn þar sem talað er niður til manns… og maður er varla manneskja í augum þessara aðila og svoleiðis tiltal er sárt Hrafnhildur mín þú verður bara að reyna að skilja það,“  skrifar Jón meðal annars en á þessu máli eru ýmsir vinklar.

Búddisti úti í Svíþjóð

Jón Ólafur birti áðurnefnda grein á trolla.is þar sem hann fór yfir málið fyrir sína parta en bæði DV og Morgunblaðið hafa gert sér mat úr þeim pistli. Jón Ólafur segir að hann sé ekki að sækjast eftir neinni vegsemd sjálfu sér til handa, hann er ekki að sækjast eftir peningum, af þeim eigi hann nóg en hann býr í ágætu yfirlæti í Svíþjóð, hann er búddisti sem hefur starfaði lengi í meðferðargeiranum með börnum og unglingum sem hafa átt erfitt í lífinu og nú er hann ábyrgur fyrir hamfarastjórnun í bænum sem hann er búsettur í.

Páll Baldvin. Bók hans Síldarárin hefur verið kölluð stórvirki og er hún tilnefnd til hinna Íslensku bókmenntaverðlauna. En, þó bókin hafi hlotið lofsamlegar móttökur eru þeir til sem telja hann hafa farið heldur frjálslega með heimildir.visir/vilhelm

Jón Ólafur segist vilja verja smælingjana, þessa litlu kalla sem eru að reyna að halda utan um þessa sögu í sjálfboðavinnu; sögu sem svo mörgum þykir vænt um. Og ekki síður það að á tímum nets umgangist menn heimildir af virðingu og gæti að höfundar- og sæmdarrétti. Og gerist ekki uppvísir af hreinum og klárum ritstundi. Jón Ólafur telur fulla ástæðu til að skoða þau mál almennt.

Egill fer frjálslega með heimildir líka

Jóni Ólafi fannst það svo nánast karmatískt þegar hann fylgdist með þætti Egils Helgasonar um Siglufjörð í gærkvöldi þar sem sjónvarpsmaðurinn vinsæli fer að sögn Jóns afar frjálslega með heimildir. Egill fái lánað frá sér efni án þess að á það sé minnst og ekki svo mikið sem þakkir í kreditlista í lokin. En, þar er Jón Ólafur að vísa til efnis sem Jón Ólafur fann í Svíþjóð og gaf Síldarminjasafninu.

„Egill fann ekkert þessa kvikmynd í Svíþjóð eftir eitthvað grúsk,“ segir Jón Ólafur en honum þykir það magnað að þetta skyldi svo koma upp strax ofan í ágreining hans við Pál Baldvin og Forlagið.



Jón Ólafur segist reyndar til í að fyrirgefa Agli af því að þættir hans séu svo góðir og Egill þakki sér bara síðar.



„En, það var eins og ég hafi hent handsprengju á þessa eyju.

Eins og rigni upp í rassgatið á þeim og nefið samtímis, þeir líta svo stórt á sig,“

segir Jón Ólafur sem enn bíður eftir ásættanlegum viðbrögðum frá Forlaginu.

Egill Örn á skrifstofu sinni. Svo óheppilega vildi til að í svarbréfi Páls Baldvins til Jóns Ólafs fylgdu tölvupóstssamskipti sem fóru milli Páls, Egils og Bjarna Guðmarssonar ritstjóra þar sem þeir fara fremur háðuglegum orðum um Jón Ólaf.vísir/jakob

Páll Baldvin hafi reynt að biðjast afsökunar en Jón Ólafur telur að það hafi hann gert af þótta og með fyrirvörum.

Vændur um að vera fullur

„Og ekki gat hann getað stillt sig um að segja mig hafa brugðist of harkalega við og verið „jólarakur“ sem þýðir að ég sé fullur. Ofan á allt og var ég þó búinn að vara hann við og biðja þá um að reyna að afgreiða þetta sómasamlega.“



Jón Ólafur telur málið enn óuppgert. Og hann telur Pál hafa reynt að ljúga sig út úr málinu í samtali við Morgunblaðið; það gangi ekki að klippa út efni héðan og þaðan og kalla sitt.

Páll Baldvin er ekki sá eini sem valsar um heimildirnar eins og hann eigi þær að mati Jóns Ólafs. Egill Helgason er undir þá sök seldur einnig.vísir/vilhelm

„Að þú skulir vera að reyna að ljúga þig út úr þessu Páll Baldvin Baldvinsson er með er með ólíkindum og þú særir og móðgar mig einu sinni enn sem og alla aðra Siglfirðinga nær og fær,“ skrifar Jón Ólafur fullum fetum á Facebooksíðu sína.

Hannes Hólmsteinn segir vel koma á vondan

Málið allt er heldur snúið og enn bætist eitt flækjustig við það þegar Hannes Hólmsteinn Gissurarson blandar sér óvænt í það með færslu á sinni Facebooksíðu.

Hannes Hólmsteinn segir að Páll hafi farið fyrir Halldórseigendafélaginu sem hann kallar svo á sínum tíma, þegar Hannes var sakaður um ritstuld.Stöð 2

Hann telur sig hafa orðið fyrir barðinu á því sem hann kallar vinstri pressu og svo Páli Baldvin sjálfum á sínum tíma þegar hann var sakaður um að hafa farið frjálslega með þegar hann tók saman ritröð um Halldór Laxness á sínum tíma, ritstuld en hann var að lokum dæmdur fyrir brot á höfundarréttarlögum.



„Páll Baldvin var gerður út af Halldórseigendafélaginu í „Ísland í dag“ á Stöð tvö 22. september 2003 til að ráðast harkalega á fyrsta bindi ævisögu Halldórs K. Laxness eftir mig. Hann taldi mig hafa farið frjálslega með heimildir (en ég hafði óspart nýtt mér æskuminningar Halldórs án þess að geta þess sérstaklega í hvert skipti, heldur aðallega með athugasemd í eftirmála). Heimildaskráin beið líka þriðja bindis verksins,“ skrifar Hannes og ljóst að hann telur nú að vel komi á vonda.



„Í hönd fóru látlausar árásir vinstri sinnaðra menntamanna í Háskólanum og fjölmiðlum á mig. Nú verður fróðlegt að vita, hver viðbrögðin verða.“

Jól rakur eða Jón rekur

Uppfært 15:40



Eins og fram kemur í þessari samantekt metur Jón Ólafur það svo að Páll Baldvin telji, í afsökunarbeiðni sem hann ritar við grein Jóns Ólafs á Trölla, sig drukkinn þegar hann talar um sig sem „Jól rakan“. Við nánari athugun verður þó að ætla að sú sé ekki merking Páls Baldvins heldur að um innsláttarvillu sé að ræða. Að „Jól rakur“ eigi að vera Jón rekur. En, sjá má nánar þau orð Páls og samhengið hér neðar:

Tengd skjöl


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.