Fótbolti

UEFA bannar áhorfendur í leiknum á móti Englandi á Laugardalsvellinum

Óskar Ófeigur Jónsson skrifar
Laugardalsvöllur verður tómur þegar enska landsliðið mætir í næsta mánuði.
Laugardalsvöllur verður tómur þegar enska landsliðið mætir í næsta mánuði. Getty/Abdulhamid Hosbas

Margir knattspyrnuáhugamenn hér á landi voru örugglega búnir að bíða spenntir eftir leik Íslands og Englands í Þjóðadeild UEFA sem fer fram á Laugardalsvellinum 5. september næstkomandi.

Það er enn mánuður í leikinn og því ekki vitað hvernig ástandið verður á Íslandi þá hvað varðar kórónuveirufaraldurinn. Það breytir ekki því að Knattspyrnusamband Evrópu, UEFA, hefur nú tekið þá ákvörðun að engir áhorfendur verði leyfðir á landsleikjum á vegum sambandsins í september.

Þetta kemur fram í frétt hjá norska knattspyrnusambandinu sem segir frá því að engir áhorfendur verði leyfðir á heimaleik liðsins á móti Austurríki sem fer fram 4. september.

Ísland og England mætast daginn eftir eða 5. september. Þremur dögum síðar spilar íslenska landsliðið út í Belgíu á móti heimamönnum og þar verður heldur engir áhorfendur leyfðir. Það á síðan eftir að taka ákvörðun um hvernig þessu verður háttað í landsleikjaglugganum í október.

Það er ljóst að þetta eru ekki skemmtilegar fréttir enda fögnuðu eflaust margir þegar Íslands og Englands drógust saman í riðil í Þjóðadeildinni.

Þetta er fyrsti keppnisleikur Íslands og Englands á íslenskri grundu og fyrsti leikur enska A-landsliðsins hér á landi. Þetta er líka fyrsti leikur þjóðanna síðan að íslensku strákarnir sendu enska landsliðið heim á EM í Frakklandi sumarið 2016.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.