Erlent

Twitter bannar fylgj­endur fjar­stæðu­kenndrar sam­særis­kenningar um Trump

Kjartan Kjartansson skrifar
Stuðningsmaður Trump heldur á lofti tákninu „Q“ fyrir QAnon-samsæriskenninguna á stuðningsmannafundi forsetans á Flórída árið 2018. Trump hefur ítrekað áframtíst skilaboðum frá QAnon-reikningum á Twitter og lofað frambjóðendur repúblikana sem aðhyllast kenninguna.
Stuðningsmaður Trump heldur á lofti tákninu „Q“ fyrir QAnon-samsæriskenninguna á stuðningsmannafundi forsetans á Flórída árið 2018. Trump hefur ítrekað áframtíst skilaboðum frá QAnon-reikningum á Twitter og lofað frambjóðendur repúblikana sem aðhyllast kenninguna. Vísir/Getty

Fleiri en sjö þúsund Twitter-reikningum sem tengjast fjarstæðukenndri samsæriskenningu af hægri vængnum um Donald Trump Bandaríkjaforseta hefur verið eytt. Twitter segir að gripið hafi verið til aðgerðanna vegna samstilltra árása fylgismanna kenningarinnar á aðra notendur á miðlinum.

QAnon er framandleg og stoðlaus samsæriskenning sem gengur út á að Trump Bandaríkjaforseti heyi leynilegt stríð á bak við tjöldin til að uppræta voldug satanísk barnaníðingssamtök á heimsvísu sem leggja á ráðin gegn honum. Kenningunni hefur vaxið ásmegin á ysta hægri væng bandarískra stjórnmála og nú er svo komið að sumir frambjóðendur Repúblikanaflokksins aðhyllast hana.

Twitter tilkynnti í gær að fyrirtækið hefði nýlega eytt þúsundum reikninga sem eru tileinkaðir QAnon-samsærinu. Það vinni ennfremur að því að fjarlægja vefslóðir sem vísa í kenninguna úr uppástungum og nýjustu straumum sem miðillinn heldur að notendum. Aðgerðirnar gætu á endanum haft áhrif á fleiri en 150.000 reikninga, að sögn Washington Post.

Vísaði Twitter til samhæfðra árása á einstaklinga og brota á notendaskilmálum miðilsins.

Aðgerðir samfélagsmiðilsins komu fast á hæla þess að QAnon-fylgjendur létu hótunum og fölskum fullyrðingum rigna yfir fyrirsætuna Chrissy Teigen í síðustu viku. Hún lokaði á fleiri en milljón Twitter-notendur og hótaði því að hætta á miðlinum ef fyrirtækið aðhefðist ekkert. Teigen er með um þrettán milljón fylgjendur á Twitter en fyrirtækið neitar því að aðgerðir þess tengist máli Teigen beint.

„Þið hafið ekki „rétt“ á að samhæfa árásir og setja fram líflátshótanir. Það er ekki „skoðun“ að kalla fólk barnaníðinga sem nauðga og éta börn,“ tísti Teigen og svaraði gagnrýnendum sem sökuðu Twitter um ritskoðunartilburði.

FBI telur hryðjuverkahættu af kenningunni

Twitter er ekki fyrsti samfélagsmiðilinn til að banna QAnon-fylgjendur. Reddit lokaði spjallborði um QAnon fyrir að hvetja til ofbeldis fyrir tveimur árum og Facebook sagðist hafa fjarlægt QAnon-síður í maí, að sögn Washington Post.

Bandaríska alríkislögreglan (FBI) varaði við því í fyrra að QAnon-samsæriskenningin ætti líklega eftir að fá bæði hópa og einstaklinga til þess að fremja lögbrot eða beita ofbeldi.

Það hefur þó ekki stöðvað Trump forseta í að deila tístum með QAnon-kenningum ítrekað í gegnum tíðina. Á stuðningsmannafundum hans sjást einnig merki hreyfingarinnar á fötum og húfum.

Nokkrir fylgjendur QAnon hafa fengið framgang í forvölum Repúblikanaflokksins fyrir ýmis embætti að undanförnu. Þannig velti áskorandi sem hefur lýst stuðningi við kenninguna sitjandi þingmanni flokksins úr sessi í forvali í Colorado í síðasta mánuði.

Marjorie Taylor Greene, frambjóðandi Repúblikanaflokksins til fulltrúadeildarþingsætis í Georgíu, lýsti QAnon sem „tækifæri sem kemur einu sinni á lífsleiðinni til þess að fjarlægja þennan alþjóðlega hring djöfladýrkandi barnaníðinga“. Trump hefur tíst stuðningi við hana jafnvel þó að leiðtogar á repúblikana hafi reynt að fjarlægja sig henni.

Greene hefur jafnframt haft uppi rasískar fullyrðingar um að svartir Bandaríkjamenn séu „þrælar“ Demókrataflokksins og að auðkýfingurinn George Soros sé nasisti.

New York Times segir ekki ljóst hversu margir frambjóðendur repúblikana trúi á samsæriskenninguna en þeir gætu hlaupið á tugum. Þó að forysta flokksins reyni að bendla sig ekki við kenninguna styðji hún frambjóðendurna á bak við tjöldin.

Twitter nú nóg boðið vegna framferðis fylgjenda QAnon-samsæriskenningarinnar sem brjóta notendaskilmála og samhæfa árásir á aðra notendur.AP/Matt Rourke

Samfélagsmiðlar magna upp dreifinguna

QAnon-kenningin á rætur sínar að rekja til alræmda spjallborðsins 4chan þar sem notandi sem kallaði sig aðeins „Q“ og fullyrti að hann væri hátt settur opinber embættismaður skildi eftir torræð skilaboð. Fylgjendur kenningarinnar gera svo sitt besta til þess að túlka boðskap Q.

Kjarni kenningarinnar er að Trump, studdur hernum, hafi boðið sig fram til forseta til að bjarga löndum sínum frá svonefndu „djúpríki“ embættismanna sem misnota börn og dýrka djöfulinn. Demókratar, pólitískir andstæðingar Trump, styðji þessi varmenni. Fylgjendur kenningarinnar bíða eftir „Vakningunni miklu“, þegar sannleikurinn lítur loksins dagsins ljós.

Í umfjöllun The Guardian frá því í júní kom fram að Qanon þróaðist út úr annarri stoðlausri samsæriskenningu sem gekk undir nafninu „Pizzagate“. Það gekk út á að Hillary Clinton, forsetaframbjóðandi demókrata árið 2016, ræki barnaníðingshring í kjallara flatbökustaðarins Comet Ping Pong í Washington-borg. Karlmaður á þrítugsaldri var dæmdur í fjögurra ára fangelsi eftir að hann hleypti af skotum úr hríðskotariffli inni á staðnum þegar hann sagðist „rannsaka“ kenninguna í desember árið 2016.

Samfélagsmiðlar eru sagðar eiga þátt í að dreifa QAnon-samsæriskenningunni og vekja athygli fólks á henni. Þannig sagði breska blaðið í umfjöllun sinni að blaðamenn þess hafi ekki leitað efni QAnon sérstaklega uppi heldur hafi Facebook mælt með QAnon-hópi við einn þeirra sem hafði gengið í hópa stuðningsmanna Trump og andstæðinga bóluefna og útgöngubanna sem tengjast kórónuveirufaraldrinum.

Maður í QAnon-bol á fundi Trump með stuðningsmönnum í Tampa á Flórída árið 2018. Fylgjendur kenningarinnar stoðlausu trúa því að Trump eigi í höggi við sataníska barnaníðinga þess sem þeir kalla „djúpríkið“.Vísir/Getty

Tengdar fréttir

Twitter takmarkar aðgang að tísti forsetans

Samfélagsmiðillinn Twitter hefur dregið úr aðgangi að tísti Donalds Trump Bandaríkjaforseta, þar sem hann hótar að beita hvern þann sem reynir að koma á fót sjálfstjórnarsvæði í Washington D.C., höfuðborg Bandaríkjanna, valdi. Tístið birti forsetinn í dag.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×