Innlent

Víða gular við­varanir vegna veðurs

Sylvía Hall skrifar
Þó það sé leiðindaveður mega Íslendingar búast við aðeins betra veðri í næstu viku þegar norðanskotinu lýkur. 
Þó það sé leiðindaveður mega Íslendingar búast við aðeins betra veðri í næstu viku þegar norðanskotinu lýkur.  Veðurstofa ÍSlands

Það dregur úr rigningunni á Vestfjörðum og Ströndum upp úr hádegi í dag eftir mikið vatnaveður undanfarna daga. Þó má reikna með áframhaldandi úrhelli á utanverðum Tröllaskaga og dregur ekki úr úrkomu þar fyrr en í nótt. Þetta kemur fram í hugleiðingum veðurfræðings hjá Veðurstofu Íslands.

Gular úrkomuviðvaranir eru því í gildi fyrir norðan í dag. Gular viðvaranir eru einnig í gildi á Norðurlandi eystra, Austfjörðum og á Suðausturlandi þar sem þar sem er spáð strekkingsvindi með hviðum um eða yfir 25 m/s. Ökumenn ökutækja sem taka á sig mikinn vind eru beðnir um að fara varlega á þeim svæðum enda varasamar hviður við fjöll.

Það verður svalt veður á á Norðurlandi og er ekki búist við því að hiti fari yfir sjö stig. Þó er hlýrra á Suðurlandi og má búast við allt að 18 stigum á Suðausturlandi.

Þá er spáð mun skaplegra veðri á morgun þrátt fyrir stíga norðvestanátt fyrir austan og mega landsmenn búast við hefðbundnu sumarveðri eftir helgi. „Þá verðum við vonandi fljót að gleyma þessu leiðinda norðanskoti,“ segir að lokum í hugleiðingum veðurfræðings.

Veðurhorfur á landinu næstu daga

Á sunnudag:

Norðvestan 10-18 m/s austantil á landinu, en vestan 3-8 vestantil. Rigning NA-til, en annars skýjað með köflum. Dregur smám saman úr vindi og úrkomu fyrir austan. Hiti 8 til 18 stig, hlýjast syðst.

Á mánudag og þriðjudag:

Vestan 3-8 m/s, skýjað með köflum og yfirleitt þurrt. Hiti yfirleitt 8 til 15 stig.

Á miðvikudag:

Hæg vestlæg eða breytileg átt, skýjað með köflum, en dálítil væta á stöku stað. Hiti breytist lítið.

Á fimmtudag og föstudag:

Hæg breytileg átt, skýjað og lítilsháttar vætu öðru hverju. Áfram milt veður.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.