Innlent

Semja um nýtt hjúkrunarheimili

Stefán Ó. Jónsson skrifar
Úr Reykjanesbæ þar sem hjúkrunarheimilinu er ætlað að rísa.
Úr Reykjanesbæ þar sem hjúkrunarheimilinu er ætlað að rísa. Vísir/Vilhelm Gunnarsson

Sextíu herbergja hjúkrunarheimili mun rísa í Reykjanesbæ, gangi fyrirætlanir hins opinbera og bæjarfélagsins eftir. Svandís Svavarsdóttir heilbrigðisráðherra og Kjartan Már Kjartansson bæjarstjóri Reykjanesbæjar, eru sögð hafa undirritað samning á dögunum þess efnis, en stefnt sé að því að heimilið verði tekið í notkun 2023.

Áætluð stærð nýja hjúkrunarheimilisins er um 3900 fermetrar og áætlaður framkvæmdarkostnaður er um 2.435 milljónir króna. Í tilkynningu sem almannatengslafyrirtæki sendir fyrir hönd Reykjanesbæjar segir að nýbyggingin muni rísa við hlið núverandi hjúkrunarheimlis á Nesvöllum - „og verður samtengd því í samræmi við áherslur Reykjanesbæjar,“ eins og það er orðað.

Rísi hjúkrunarheimilið myndi hjúkrunarrýmum í bæjarfélaginu fjölga um 30. „Hin 30 rýmin koma í stað þeirrar rýma sem nú eru í notkun hjúkrunarheimilinu á Hlévangi, en því verður þá lokað,“ segir í fyrrnefndri tilkynningu.

Þar er þess jafnframt getið að framkvæmdin sé á höndum sveitarfélagsins, samkvæmt fyrrnefndum samningi. „Reykjanesbær annast fjármögnun framkvæmdakostnaðar en heilbrigðisráðuneytið greiðir sveitarfélaginu 85% kostnaðarins á árunum 2020-2023 í samræmi við framvindu verksins. Sveitarfélagið mun greiða 15% af framkvæmdakostnaði.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.