Svona væri hægt að bregðast við á­kvörðun Kára

Engin ástæða er til annars en að halda áfram á sömu braut með skimanir að sögn Páls Þórhallssonar, skrifstofustjóra í forsætisráðuneytinu. Margir hafi lagt verulega mikið á sig í baráttunni við kórónuveiruna og það hafi verið afrek að koma upp skimunaraðstöðu við landamærin.

Þetta kom fram í máli Páls á upplýsingafundi fyrr í dag þar sem farið var yfir stöðu mála. Ljóst er að erfið staða er uppi eftir að Kári Stefánsson, forstjóri Íslenskrar erfðagreiningar, lýsti því yfir í gær að fyrirtækið myndi ekki taka þátt í frekari skimunum frá og með næsta mánudegi.

Eins og staðan er núna getur sýkla- og veirufræðideild Landspítalans greint um 500 sýni á dag og ekki er von á afkastameiri tækjabúnaði fyrr en í október. Alma Möller landlæknir benti á að mikil eftirspurn væri eftir slíkum búnaði og því væri Landspítalinn á biðlista.

Nú þarf því að leita annarra leiða til þess að halda óbreyttu fyrirkomulagi á skimunum, enda hafði Íslensk erfðagreining spilað stórt hlutverk við framkvæmd þeirra. Þórólfur Guðnason sóttvarnalæknir sagði ýmsar útfærslur hafa verið skoðaðar en það hefði ekki gengið nógu vel, sem væri brotalöm á kerfinu. Tækjabúnaður Íslenskrar erfðagreiningar hafi verið afar dýrmætur við framkvæmd á verkefninu.

Páll Þórhallsson sagði að meðan beðið væri eftir nýjum búnaði væri verið að vinna að því að bæta þann búnað sem er til staðar á spítalanum.

Ýmsir möguleikar í stöðunni

Til greina kemur að hætta skimunum á ferðamönnum frá ákveðnum svæðum þar sem baráttan við faraldurinn hefur gengið vel, en slíkt hefur verið gert með ferðamenn frá Færeyjum og Grænlandi. Þórólfur segir það vera í skoðun og það komi jafnframt sterklega til greina.

Fulltrúar Landspítalans funduðu nú klukkan 13 og var meðal annars til umræðu hvort hægt væri að taka sýni og greina nokkur saman í stað þess að greina eitt í einu. Þórólfur sagði slíkt hafa gengið ágætlega í Þýskalandi en væri þó síðri kostur en sú útfærsla sem hefur verið notast við hér á landi til þessa. Með því væri þó hægt að spara mikla vinnu og efniskostnað.

Þá kemur einnig til greina að takmarka farþegafjölda hingað til lands, en Víðir Reynisson yfirlögregluþjónn sagði það hafa legið fyrir að á einhverjum tíma myndi greiningargeta og farþegafjöldi ekki fara saman. Sóttvarnalæknir hefði óskað eftir því við Isavia að fjöldi farþega yrði takmarkaður á ákveðnum tíma. Nú þegar væri takmörkun til staðar út frá afkastagetu við skimun svo frekari takmarkanir væru ekki útilokaðar.

Þórólfur sagði að það hefði áður verið í skoðun hvort hægt væri að styðjast við vottorð erlendis frá. Það kæmi til greina að taka slíkt upp og gera þá strangar kröfur um vottorð. Allt færi þetta eftir því hversu mörgum sýnum Landspítalinn gæti tekið við.

Ef fleiri smit kæmu upp væri það á endanum þó pólitísk ákvörðun hvort nauðsynlegt sé að stíga skref aftur.

Þórólfur telur þó ekki ástæðu til þess að hætta að skima á flugvellinum. Með skimun yrði til dýrmæt þekking sem hjálpaði stjórnvöldum að ákveða næstu skref.