Enn renna menn á Greifa­velli: Slitin kross­bönd, rauð spjöld, víta­spyrnur og töpuð stig

Í gær fór fram leikur KA og Breiðabliks á Greifavelli á Akureyri í Pepsi Max deildinni í fótbolta. Gestirnir úr Kópavogi björguðu stigi með marki úr vítaspyrnu í uppbótartíma eftir að Hrannar Björn Steingrímsson, varnarmaður KA, rann á vellinum og boltinn hafði í kjölfarið viðkomu í hendi leikmannsins.

Atvikið má sjá í spilaranum hér að neðan sem og vítaspyrnuna sem KA fékk dæmda skömmu áður.

Undir lok fyrri hálfleiks fékk Thomas Mikkelsen, framherji Breiðabliks, gult spjald þegar völlurinn sveik hann. Fyrsta snerting Mikkelsen sveik hann reyndar áður en völlurinn tók til sinna mála. 

Mikkelsen gerði heiðarlega tilraun til að setja Bjarna Aðalsteinsson, leikmann KA, undir pressu eftir að missa boltann. Gekk það ekki betur en svo að vinstri fótur danska framherjans rann á lausum vellinum og Daninn skall á Bjarna sem lá sárþjáður eftir.

Mikkelsen var ekki sá eini sem átti erfitt með að fóta sig á vellinum en leikmenn beggja liða áttu erfitt með að halda sér á jörðinni sem og Jóhann Ingi Jónsson, dómari leiksins, en hann flaug á hausinn á meðan leik stóð. Þá meiddist Gísli Eyjólfsson, leikmaður Blika, á nára í gær og verður frá í einhverjar vikur. 

Sem betur fer fyrir KA höfðu vallaraðstæður ekki jafn slæmar afleiðingar og í leik KA og Leiknis Reykjavíkur í Mjólkurbikarnum á dögunum. 

Sá leikur var aðeins tuttugu mínútna gamall þegar Sólon Breki Leifsson, framherji Leiknis, ætlaði sér að setja pressu á Hallgrím Jónasson, miðvörð KA, með þeim afleiðingum að sóknarmaðurinn ungi missti jafnvægið og skall af öllu afli á Hallgrími.

Niðurstaðan sú að Hallgrímur er nú fótbrotinn og með slitið krossband.

Aðeins tíu mínútum síðar rann Sólon aftur, að þessu sinni er hann hljóp í áttina að Kristijan Jajalo, markvörð KA. Sem betur fer slapp markvörðurinn betur en Hallgrímur. Sólon fékk hins vegar sitt annað gula spjald í leiknum og þar með rautt. Brynjar Hlöðversson, samherji Sólons, fór svo sömu leið eftir að mótmæla dómnum.

KA hefur nú leikið tvo deildarleiki og einn bikarleik á Greifavelli. Markalaust jafntefli var niðurstaðan í leik Víkings og KA. Í 6-0 sigrinum gegn Leikni þá misstu heimamenn Hallgrím Jónasson, einn besta varnarmann deildarinnar, í meiðsli fram að næstu leiktíð hið minnsta.

Svo í gær gegn Blikum þá kostaði völlurinn þá tvö stig og í raun var það aðeins heppni að ekki fór verr þegar Mikkelsen rann á Bjarna.

Vallaraðstæður voru til umræðu bæði eftir leik sem og í Pepsi Max Stúkunni á sunnudagskvöld. Sævar Pétursson, framkvæmdastjóri KA, tjáði sig á Facebook-síðu sinni þar sem hann bendir á að KA hafi beðið um að spila ekki heimaleik svo skömmu eftir að N1-mótið færi fram þar í bæ. 

Þá fékk félagið ekki styrk úr mannvirkjasjóði KSÍ en Sævar segir það löngu ljóst að völlurinn þurfi andlitslyftingu. Til að mynda eru drenlagnir vallarins ónýtar og kostar sitt að skipta um þær.

Eftir aðeins þrjá leiki ætti KA að hafa næg sönnunargögn þess efnis að Greifavöllur þurfi á uppfærslu að halda ef ekki á illa að fara í sumar eða á komandi misserum.

Fréttin hefur verið uppfærð.