Lífið

Kláraði háskólagráðuna í skiptinámi frá Svíþjóð í stofunni heima

Hallgerður Kolbrún E. Jónsdóttir skrifar
Ísak hyggst leggja land undir fót og flytja til Bretlands í haust en hann hefur fengið inngöngu í Oxford-háskóla.
Ísak hyggst leggja land undir fót og flytja til Bretlands í haust en hann hefur fengið inngöngu í Oxford-háskóla. Aðsend

Ísak Valsson útskrifaðist með hreina tíu í meðaleinkunn í hagnýtri stærðfræði frá Háskóla Íslands síðastliðinn laugardag. Ísak hefur fengið inngöngu í háskólann í Oxford á Bretlandi í haust og segist hann nokkuð kvíðinn fyrir því, enda kórónuveirufaraldurinn enn í mikilli sókn þar í landi.

Þetta er ekki fyrsta skiptið sem Ísak skarar fram úr í námi en hann varð dúx á stúdentsprófi frá Verzlunarskóla Íslands vorið 2016. Hann hóf nám í verkfræðilegri eðlisfræði við Háskóla Íslands en skipti yfir í hagnýta stærðfræði ári síðar.

„Mér fannst bara alltaf skemmtilegast í stærðfræðiáföngunum sem voru í verkfræðilegu eðlisfræðinni og ákvað þá eftir eitt ár að skipta bara yfir. Mér fannst þetta í raun það skemmtilegasta og langaði bara að fara í pjúra stærðfræði.“

„Hagnýta stærðfræðin fer mikið út í tölulega greiningu, líkanagerð og gagnavinnslu sem eru allt hlutir sem munu nýtast mjög vel á vinnumarkaðnum,“ segir Ísak.

Ísak ásamt föður sínum Vali Frey Einarssyni á útskriftardaginn.Aðsend

Hann segist hafa verið heppinn með það hvað hann eignaðist góða vini innan stærðfræðinnar en hann hafi líka alltaf lagt mikinn metnað í námið og það hafi hjálpað honum mikið. „Ég er búinn að vera í mjög góðum hópi innan stærðfræðinnar, fjórir strákar sem eru oftast að læra saman og ræða vandamálin, ræða verkefni og svona. Við höfum verið saman í þessu, það er gott að vera ekki alltaf einn að læra heldur í samtali, fá aðstoð og geta rætt og fengið hugmyndir hjá hver öðrum.“

Hann hafi þó alltaf átt auðvelt með að læra. „Ég hef mikinn áhuga á stærðfræði og hef alltaf lagt mikinn metnað í námið og ætlaði alltaf að standa mig eins vel og ég gæti, þó ég ætlaði nú kannski ekki að fá tíu í öllu en ætlaði samt að reyna að standa mig eins vel og ég gat.“

Hvernig var það að klára háskólanámið þegar skólinn var lokaður og námið fór fram í gegn um netið?

„Það var alveg steikt, ég verð að viðurkenna það. Ég var líka í skiptinámi úti í Svíþjóð í lokin en var í rauninni bara í fjarnámi heima í stofu í Reykjavík en samt í “skiptinámi” í Svíþjóð. Ég var í sóttkví á fjarfundafyrirlestrum og bara að gera allt sjálfur. Í lokin var ég eiginlega ekki í neinum samskiptum við samnemendur mína því ég var bara einn heima.“

„Þetta var áhyggjuefni, að búa við þessar aðstæður“

Ísak fór í skiptinám í háskólanum í Lundi í vor og segir hann reynsluna hafa verið mjög skemmtilega, í þann stutta tíma sem hann fékk að vera úti. „Mér fannst mjög skemmtilegt að fara og prófa annan skóla og geta borið það saman við HÍ og prófa að vera í stærri skóla erlendis.“

„Ég kynntist mörgum skiptinemum, aðalega frá Spáni og Ítalíu en líka krökkum frá Svíþjóð. Ég kynntist eiginlega engum Íslendingum,“ segir Ísak en í Lundi er nokkuð stórt samfélag Íslendinga. „Þeir voru lítið í minni deild.“

Ísak útskrifaðist með hreina tíu í meðaleinkunn í hagnýtri stærðfræði frá Háskóla Íslands.Aðsend

Hann segir samnemendur sína frá Spáni og Ítalíu hafa verið nokkuð róleg yfir ástandinu þegar kórónuveirufaraldurinn barst til Evrópu. „Þau fóru heim og voru aðalega hrædd um ömmur sína og afa. Sum voru frá héraðinu sem varð verst úti á Ítalíu. Þetta var alveg áhyggjuefni að búa við þessar aðstæður.“

Ísak starfar nú í sumar við áhættustýringu í Landsbankanum og segir hann námið nýtast vel í starfinu. „Það er aðalega gagnavinnsla sem nýtist mér best í þessari vinnu, gagnavinnsla og forritun sem maður lærir slatta af í stærðfræðinni. En líka bara að vera fljótur að ná tökum á ólíkum verkefnum, nýjum hlutum og nýjum hugtökum.“

Ísak er á leiðinni í meistaranám í stærðfræði í Oxford á Bretlandi í haust. Um fimmtíu manns komast inn í námið ár hvert og segir Ísak að um fjögur hundruð manns hafi sótt um námið. „Ég held þú sækir ekkert um nema þú sért með yfir eitthvað ákveðið í meðaleinkunn,“ segir Ísak.

Á enn eftir að læra meira og kynnast því sem er áhugaverðast

Námið er árs langt og heitir Mathematical Sciences, sem er stærðfræði sem tengist einhverri ákveðinni vísindagrein. Ísak hyggst sérhæfa sig í líkinda- og tölfræði „og hugsanlega blanda því saman við einhverja líffræði. Ég ætla til dæmis að taka einn áfanga í genastærðfræði.“

„Þá getur maður farið út í rannsóknir sem tengjast heilbrigðisvísindum og unnið í einhverju þverfaglegu, unnið með einhverjum úr heilbrigðisstofnunum og með einhverjum af öðrum sviðum. Blandað þessu inn í eitthvað mjög hagnýtt.“

Hann segist þó ekki viss um það hvað hann langi að gera í framtíðinni. Draumastarfið sé honum enn hulið. „Ég veit ekki endilega hvað mig langar að gera. Ég á enn þá eftir að læra meira og kynnast því nákvæmlega hvað mér finnst áhugaverðast. Bs-inn er bara grunnur þó maður sé búinn að læra mjög lengi þá er enn þá alls konar sem maður getur lært.“

Ísak segist nokkuð kvíðinn yfir því að þurfa að flytja til Bretlands en kórónuveirufaraldurinn er enn í mikilli sókn þar í landi og virðist ekkert lát þar á. „Mér finnst það frekar óþægilegt. Skólinn sendir reglulega pósta með nýjum upplýsingum og segja núna að það eina sem verði með öðru sniði en vanalega eru stórir fyrirlestrar. Þeir verða á netinu. Minni hittingar eins og dæmatímar og umræðutímar verða áfram.“

„Það mæta allir á svæðið svo maður verður allavega ekki heima á Íslandi í fjarnámi. Það væri ekki þess virði ef það væri svoleiðis.“

Ekki er boðið upp á að fresta náminu um eitt ár eins og margir aðrir skólar erlendis hafa gripið til. „Ef þú vilt taka námið seinna verðurðu að sækja um aftur á næsta ári.“


Tengdar fréttir

Dúxinn orðið fyrir ó­með­vituðum for­dómum

Ivana Anna Nikolic útskrifaðist með hæstu meðaleinkunn á meistaraprófi í sögu Lagadeildar Háskóla Íslands þegar hún útskrifaðist með meistaragráðu, Mag. Jur., á laugardaginn síðastliðinn.

Dúxaði með 9,7 í ein­kunn og stefnir á tölvunar­fræði í haust

Reyn Alpha Magnúsar er annar tveggja dúxa sem útskrifaðist úr Tækniskólanum í Eldborgarsal Hörpu föstudaginn 29. maí. Reyn útskrifaðist af tölvubraut með 9,7 í einkunn og dúxaði hán ásamt Njáli Halldórssyni sem útskrifaðist af náttúrufræðibraut flugtækni.

Dúxaði í Verzló og stefnir á raf­magns­verk­fræði í King's College

„Þetta var mjög frábrugðið öllu sem við þekktum og það var svolítið sjokk að fara beint úr dagskóla í 100 prósent fjarnám,“ segir Snædís Edwald Einarsdóttir, sem útskrifaðist af eðlisfræðibraut úr Verzlunarskóla Íslands og lauk hún náminu með 9,73 í einkunn og varð jafnframt dúx.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.