Íslenski boltinn

Fylkir vann stórsigur en ÍA þurfti framlengingu

Runólfur Trausti Þórhallsson skrifar
Stefán Teitur var hetja ÍA í kvöld.
Stefán Teitur var hetja ÍA í kvöld. Vísir/Bára

Þá er öllum nema einum leik í Mjólkurbikarnum lokið. Fylkir og ÍA eru komin í 16-liða úrslit. Á meðan Fylkir vann 8-0 stórsigur á ÍH þá þurftu Skagamenn framlengingu gegn Kórdrengjum.

Fylkir mætti í Skessuna í Hafnafirði og mætti þar 4. deildarliði ÍH. Mikið hafði verið fjallað um leikinn en þjálfari ÍH er Brynjar Ásgeir Guðmundsson, leikmaður FH. Brynjari til ama var Sam Hewson ekki með en þeir eru fyrrum samherjar og taldi þjálfarinn sig vera með leið til að stöðva Hewson.

Sama svo hvernig hefði farið með Hewson á vellinum þá áttu leikmenn ÍH engin svör gegn spræku Fylkisliði. Orri Sveinn Stefánsson skoraði fyrsta mark leiksins á 18. mínútu og áður en fyrri hálfleikur var allur höfðu Fylkismenn bætt við fimm til viðbótar. Arnór Borg Guðjohnsne skoraði þrennu og Arnór Gauti Ragnarsson tvennu. 

Aðeins róaðist leikurinn í síðari hálfleik en Fylkir bætti samt sem áður við tveimur mörkum. Þau gerðu Hákon Ingi Jónsson og Arnór Gauti Jónsson. Lokatölur 8-0 og ÍH geta nú einbeitt sér að 4. deildinni á meðan Fylkir fer áfram í næstu umferð Mjólkurbikarsins.

Í Safamýri mættust Kórdrengir, sem leika í 2. deild, og ÍA sem leikur í efstu deild. Úr varð hörku leikur.

Magnús Þórir Matthíasson, fyrrum leikmaður Keflavíkur og Fylkis, kom Kórdrengjum óvænt yfir áður en tíu mínútur voru liðnar. Þannig var staðan allt fram á 69. mínútu þegar Viktor Jónsson jafnaði metin fyrir Skagamenn.

Kórdrengir héldu eflaust að þeir hefðu tryggt sér farseðilinn í 16-liða úrslit þegar Einar Orri Einarsson, einnig fyrrum leikmaður Keflavíkur, kom þeim aftur yfir þegar tæplega tíu mínutur voru eftir. Aftur jöfnuðu Skagamenn en að þessu sinni var það Hlynur Sævar Jónsson og því þurfti að framlengja.

Þar var það Stefán Teitur Þórðarson sem reyndist hetja ÍA en hann skoraði sigurmark leiksins á 110. mínútu. Lokatölur 3-2 og Skagamenn komnir í 16-liða úrslitin.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.