Fótbolti

Lewandowski jafnaði metið sitt en getur hann náð Müller?

Sindri Sverrisson skrifar
Robert Lewandowski fagnar marki gegn Düsseldorf í gær.
Robert Lewandowski fagnar marki gegn Düsseldorf í gær. vísir/getty

Robert Lewandowski hefur aldrei skorað fleiri mörk en á þessari leiktíð eða alls 43 mörk í öllum keppnum, eftir að hann skoraði tvö marka Bayern München í 4-0 sigri á Fortuna Düsseldorf í gær.

Bayern er efst í þýsku 1. deildinni, með tíu stiga forskot á Dortmund sem á leik til góða.

Lewandowski skoraði samtals 43 mörk leiktíðina 2016-17 og hefur nú jafnað það met þegar Bayern á enn fimm deildarleiki eftir auk þess sem liðið er komið í undanúrslit þýska bikarsins og er 3-0 yfir í einvígi sínu við Chelsea í 16-liða úrslitum Meistaradeildar Evrópu sem enn stendur til að klára.

Þessi 31 árs gamli leikmaður hefur skorað 29 af mörkum sínum í þýsku 1. deildinni, þar sem hann er með fimm marka forskot á Timo Werner. Lewandowski hefur mest skorað 30 mörk á einni leiktíð í deildinni og hefur nægan tíma til að gera betur. Hann varð markakóngur í fyrra með 22 mörk og leiktíðina þar áður með 29 mörk. Aðeins Gerd Müller hefur tekist að verða markakóngur þrjú ár í röð í Þýskalandi en nú blasir sá áfangi við Lewandowski.

Pólverjinn á hins vegar enn talsvert í land með að jafna met Müllers yfir flest mörk á einni leiktíð í deildinni, en Müller skoraði 40 mörk veturinn 1971-72.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.