Ró­leg­heita­veður fram að helgi

Veðurstofan spáir rólegheitaveðri þar sem verður úrkomulítið en svalt, fram á föstudaginn langa. Spáð er norðvestan 8 til 15 metrum á sekúndu og dálitlum éljum norðaustanlands framan af degi, en annars hægum vindum og yfirleitt léttskýjuðu.

Á föstudaginn mun svo hvessa úr austri með rigningu eða slyddu á sunnanverðu landinu og heldur hlýna.

Í hugleiðingum veðurfræðings segir að útlit sé fyrir skammvinna norðaustanátt og kólnandi veðri á laugardaginn, en síðan snúist í vaxandi suðvestanátt með hlýnandi veðri, en vætu sunnan- og vestanlands.

Veðurhorfur á landinu næstu daga

Á fimmtudag (skírdagur): Suðlæg eða breytileg átt, 3-8 m/s, skýjað með köflum og vægt frost, en 8-13 m/s, smá skúrir og hiti að 5 stigum með suðurströndinni. 

Á föstudag (föstudagurinn langi): Gengur í suðaustan 10-15 m/s með rigningu eða slyddu og hiti 1 til 5 stig sunnanlands, en annars hægir vindar, bjartviðri og hiti við frostmark.

Á laugardag: Útlit fyrir skammvinna norðaustanátt með rigningu eða slyddu öðru hvoru, en þurrviðri S- og V-lands. Kólnandi veður í bili.

Á sunnudag (páskadagur): Gengur í sunnan- og suðvestanátt og hlýnar í veðri, en skýjað eystra og svalt í veðri.

Á mánudag (annar í páskum) og þriðjudag: Útlit fyrir allhvassa suðvestanátt með vætu og hlýindum, en þurrviðri NA til.