Tíunda hvert barn misnotað fyrir 18 ára aldur

Talið er að tíunda hvert barn á Íslandi verði fyrir einhverskonar kynferðislegu ofbeldi fyrir 18 ára aldur. Yfirstígum óttann, ráðstefna á vegum samtakanna Blátt áfram, fer fram í Kennaraháskóla Íslands í dag.

Markmið ráðstefnunnar er að skoða hvað samfélagið getur gert til að fyrirbyggja kynferðislegt ofbeldi á börnum.

Robert E. Longo er aðal fyrirlesari á ráðstefnunni. Hann er sjálfstætt starfandi ráðgjafi, þjálfari og rithöfundur, sem hefur sérhæft sig í forvörnum gegn kynferðislegri misnotkun.

Longo segir mikilvægt að fræða fólk um áhættuatriði til að koma í veg fyrir kynferðislega misnotkun enda séu afleiðingar slíks ofbeldis alltaf slæmar. Hann segir að gerendur geti verið ólíklegustu menn og konur, óháð stétt og stöðu. Öryggi barna sé því mjög mikilvægt og að þau séu meðvituð um rétt sinn til að segja nei.

Longo segir að það sé engin ein lýsing til á gerendum kynferðislegs ofbeldis. "Við verðum að gera börnum grein fyrir mikilvægi þess að þau séu örugg. Ef fullorðin einstaklingur biður barn um að gera eitthvað sem hljómar ekki rétt eða er óþægilegt, þá á barnið ekki að gera það."

Longo hefur mikla reynslu af meðferð þolenda og gerenda kynferðislegs ofbeldis. Hann segir að meðferð fyrir gerendur hafi gefið góða raun, einkum fyrir þá einstakinga sem fremja brot sín á unga aldri. Erfiðara sé að ná árangri í meðferð síbrotamanna, en þá þurfi að grípa til annars konar úrræða. "Það eru vissulega nokkrir fullorðnir kynferðisafbrotamenn sem ekki er auðvelt að ná árangri með. Það eru þeir einstaklingar sem eiga heima í fangelsum og sem þarf að fylgjast sérstaklega vel með. Almennt séð þá er hægt að ná árangri í meðferð gerenda kynferðislegs ofbeldis, og þá yfirleitt góðum árangri."