Ríkisendurskoðandi segir fjölskyldutengsl ekki hafa skipt máli

Sveinn Arason ríkisendurskoðandi vísar því á bug að fjölskyldutengsl hafi orðið til þess að rannsókn Ríkisendurskoðunar á kaupum ríkisins á Oracle kerfinu hafi dregist.

„Í umfjöllun fjölmiðla að undanförnu hefur verið gefið í skyn að fjölskyldutengsl mín við annars vegar fyrrverandi starfsmann Skýrr og hins vegar núverandi starfsmann fjármálaráðuneytisins hafi eitthvað með það að gera að dregist hefur að ljúka úttekt Ríkisendurskoðunar varðandi fjárhagsupplýsingakerfi ríkisins. Ég vísa þessum dylgjum algerlega á bug," segir Sveinn í yfirlýsingu sem birt er á vef Ríkisendurskoðunar.

Sveinn segir rétt að bróðir sinn, Þórhallur Arason, sé yfirmaður þeirrar skrifstofu fjármálaráðuneytisins sem annast umsýslu eigna ríkisins, þar á meðal hugbúnaðarkerfa í eigu þess. Þegar tilboð í nýtt fjárhagsupplýsingakerfi fyrir ríkið hafi legið fyrir árið 2001 og ljóst var að Skýrr væri meðal bjóðenda, hafi Þórhallur hins vegar ákveðið að víkja sæti í nefnd þeirri sem sá um að meta tilboðin þar sem annar bróðir þeirra, Atli Arason, hafi á þessum tíma verið yfirmaður sölu- og markaðssviðs Skýrr.

„Þórhallur kom með öðrum orðum ekki að ákvörðun um kaup á kerfinu. Eftir að gengið var frá kaupsamningi annaðist sérstakt svið innan Skýrr innleiðingu á kerfinu. Atli kom ekki að henni. Hann starfaði hjá fyrirtækinu til ársins 2006 en rauf þá öll tengsl við það. Ég var skipaður í embætti ríkisendurskoðanda sumarið 2008," segir Sveinn Arason.