Stefnt að feðraorlofi í Bretlandi

Feður á Bretlandi munu fá þriggja mánaða launað feðraorlof ef frumvarp viðskiptaráðherra Bretlands nær fram að ganga. Samkvæmt núverandi lögum eiga mæður aðeins rétt á hálfs árs fæðingarorlofi á launum ásamt hálfu ári til viðbótar launalausu en feður hafa engan rétt til fæðingarorlofs á launum. Reiknað er með að feður fái ríflega 100 pund á viku frá ríkinu í orlofinu og þá eiga þeir að geta framlengt leyfi sitt um þrjá mánuði og þá dreifast greiðslunar. Enn fremur hyggjast stjórnvöld lengja launað fæðingarorlof upp í heilt ár fyrir næstu kosningar. Alan Johnson, viðskiptaráðherra Bretlands, segist búast við að um níu þúsund feður muni nýta sér orlofstökuréttinn í byrjun árs 2007 en markmið laganna væri að stuðla að jafnrétti og fá fleiri konur út á vinnumarkaðinn því það kæmi sér vel fyrir efnahagslífið.