Lífvörður Lohan sagði upp af öryggisástæðum

Fyrrverandi lífvörður Lindsay Lohan hefur nú tekið það að sér að upplýsa heiminn um það nákvæmlega hversu langt leidd stjarnan unga var áður en hún fór í meðferð.

Lífvörðurinn, hinn 48 ára Lee Weaver vann fyrir Lohan í tvö ár segist hafa hætt vegna þess að starfið væri of hættulegt. Að þeirri niðurstöðu komst hann þegar hann skutlaði leikkonunni að hitta kókaínsala í Beverly Hills. Viðskiptin enduðu með því að Lohan réðst á vopnaðann eiturlyfjasalann fyrir að ætla að svindla á sér. Sá brást við með að beina byssu sinni að lífverðinum og biðja hann vinsamlegast um að fjarlægja leikkonuna ef hann vildi ekki vera skotinn.

,,Ég hef passað upp á margar villtustu stjörnur Hollywood, en enga þeirra jafn stjórnlausa og Lindsay" sagði Weaver við News of the World. ,,Hún var með algera dauðaósk og tók meira af eiturlyfjum og drakk meira en nokkur sem ég hef hitt" Ég hef misst tölu á þeim skiptum þar sem ég hélt að hún hefði tekið of stóran skammt. Ég varpaði öndinni léttar á hverjum morgni þegar ég komst að því að hún væri á lífi"



Hann segir að eftir því sem stjórnleysið jókst hafi stjarnan byrjað að skaða sjálfa sig. Eitt kvöldið hafi hann tekið eftir skurðum á höndum hennar og úlnliðum. Þegar hann krafði hana skýringa brotnaði hún niður, sagðist ekki eiga heima á þessari plánetu lengur, og að lífið væri ekki þess virði að lifa því.

Weaver, sem heldur úti heimasíðunni leetweaver.com er núna að skrifa endurminningar sínar. Þar fjallar hann um árin sem hann eyddi í að passa upp á stjörnur eins og Kim Basinger, Brad Pitt, Pamelu Anderson og vandræðagemsann og dópistann Robert Downey Jr.