Britney Spears að ættleiða kínverska tvíbura

Britney Spears hefur ákveðið að ættleiða sex ára kínverska tvíbura. Breska blaðið News of The World segir að með þessu hyggist poppdívan reyna að fylla það tómarúm sem myndaðist þegar hún missti forræði yfir sonum sínum tveimur til K-Fed.

Ekki skánaði slæm vika söngkonunnar þegar henni var bannað að keyra með synina eftir að hafa verið staðin að því að keyra yfir á rauðu ljósi með þá í aftursætinu. Lengi getur furðulegt orðið furðulegra. NOTW hefur það einnig eftir heimildarmanni sínum að Spears hafi lagt til hliðar jafnvirði rúmra þriggja milljóna króna til að borga fyrir eigin jarðarför. Britney mun hafa vaxandi áhyggjur af því að óheilbrigður lífsstíll hennar muni draga hana til dauða fyrir aldur fram. Tiltækið veldur fjölskyldu og vinum söngkonunnar miklum áhyggjum. ,,Hún virðist ekki alveg hafa hugsað þetta til enda. Ættleiðing og jarðarför? Þetta tvennt fer ekki alveg saman" sagði heimildamaður blaðsins.