Ábyrgar þorskveiðar við Ísland vottaðar

Veiðar Íslendinga á þorski í íslenskri fiskveiðilögsögu hafa hlotið vottun sem byggist á ströngustu kröfum sem settar eru á alþjóðavettvangi. Vottunin staðfestir ábyrga fiskveiðistjórnun og góða umgengni um auðlindir sjávar.

Fiskifélag Íslands, sem í eru helstu samtök hagsmunaaðila í íslenskum sjávarútvegi, hafði forgöngu um að byggja upp vottunarverkefnið á Íslandi, en það byggir á alþjóðlegum staðli; leiðbeinandi reglum matvælastofnunar Sameinuðu þjóðanna (FAO) um vottun fiskveiða og siðareglum FAO um ábyrgð í fiskimálum. Írska fyrirtækið Global Trust Certification (GTC) var fengið til að gera úttekt á stefnu og framkvæmd í þorskveiðum Íslendinga og hefur gefið út vottorð sem staðfestir að þorskveiðarnar samræmist alþjóðlegum kröfum.

Peter Marshall, framkvæmdastjóri GTC, sagði við afhendingu á vottunarskírteininu í Sjóminjasafninu Víkinni í gær að vottunin sýndi að þorskveiðum Íslendinga væri vel stjórnað og af ábyrgð. „Ísland hefur hér rutt veginn í vottunarmálum sem fleiri þjóðir og svæði eru nú í auknum mæli að fara, meðal annars Alaska og Kanada.“

Jón Bjarnason, sjávarútvegs- og landbúnaðarráðherra, segir áfangann mikilvægan fyrir Ísland. „Við sjáum fram á að íslenskar sjávarafurðir eigi enn greiðari leið inn á mikilvæga markaði og að útflutningstekjur af sjávarafurðum verði áfram mikilvæg burðarstoð í okkar efnahagslífi.“

Vottunin er mikilvæg fyrir íslenskan sjávarútveg, sem fær nú staðfest að greinin mæti kröfum markaðarins um sjálfbæra nýtingu endurnýjanlegra auðlinda. Markmiðið með verkefninu „Iceland Responsible Fisheries“ er að efla bæði innra starf í greininni og kynningu erlendis á íslenskum sjávarafurðum. Gerður hefur verið samningur við Íslandsstofu um kynningu og markaðssetningu.

Íslenskur sjávarútvegur skilaði þjóðarbúinu 209 milljörðum í gjaldeyristekjur árið 2009. Útflutningur á þorskafurðum er 36 prósent af heildarverðmæti útfluttra sjávarafurða.

svavar@frettabladid.is