Gates lofar bót á heilbrigðisþjónustu hersins

Robert Gates, varnarmálaráðherra Bandaríkjanna, lofaði í dag að hraða uppbyggingu í heilbrigðisþjónustu bandaríska hersins. Hann sagði: "Þetta er eitthvað sem við getum, verðum og viljum laga".

Í síðustu viku var birt skýrsla sem sýndi að það vantaði meira fé og fólk til að hlúa að hermönnum sem hafa verið í stríði. Margir þeirra eru þunglyndir, hafa orðið fyrir áfallaröskun eða eiga við önnur andleg vandamál að stríða. Þá kom fram í skýrslunni að yfirvöld í Pentagon þyrftu að vinna að því að styðja hermennina í að leita sér hjálpar en margir hverjir forðuðust það.