Artur fór í bíó kvöldið sem hann hvarf

Leit að Arturi Jarmoszko, 25 ára pólskum karlmanni sem ekkert hefur spurst til í tvær vikur, hefur enn engan árangur borið en um tuttugu björgunarsveitarmenn leituðu hans í dag. Lögregla hefur fengið þónokkrar ábendingar frá almenningi undanfarinn sólarhring og fjölskylda Arturs hefur látið pólsk lögregluyfirvöld vita af hvarfi hans.

Arturs hefur verið saknað síðan um mánaðamótin. Vitað er að hann tók strætó frá Breiðholti þriðjudaginn 28. febrúar og að hann fór úr strætisvagninum við Laugarásbíó rétt fyrir klukkan sjö um kvöldið. Samkvæmt upplýsingum frá lögreglu í dag bendir allt til þess að hann hafi farið einn síns liðs í bíó.

Næst er vitað um ferðir Arturs í miðbæ Reykjavíkur þar sm hann sést í öryggismyndavél í Lækjargötu taka peninga út úr hraðbanka. Rúmum þremur tímum síðar tengist sími Arturs netinu í vesturhluta Kópavogs en eftir það slökknar á símanum. Ekkert hefur spurst til hans síðan.

Formleg leit hófst að Arturi í gær en sjötíu björgunarsveitarmenn leituðu fram á kvöld á stóru svæði í kringum vesturbæ Kópavogs. Leitað var á bátum, með drónum auk þess sem gengið var meðfram ströndinni.

Talsvert færri tóku þátt í leitinni í dag en um tuttugu björgunarsveitarmenn þræddu leitarsvæðið auk þyrlu Landhelgisgæslunnar. Um klukkan sex í dag var leit björgunarsveitarfólks lokið en bátur gæslunnar fór um svæðið og skoðaði sjávarbotninn betur.

Málið er ekki rannsakað sem sakamál heldur sem mannshvarf. Lögreglan segir afar ólíklegt að Artur hafi farið úr landi, að minnsta kosti ekki eftir hefðbundnum leiðum, en fjölskylda hans ákvað í dag að gera pólskum lögregluyfirvöldum viðvart um málið og ætla að lýsa eftir honum í fjölmiðlum þar.

Guðmundur Páll Jónsson, sem styrir rannsókn málsins, sagði í samtali við fréttastofu að lögreglu hafi borist ábendingar vegna þess og að verið sé að vinna úr þeim. Búið er að yfirheyra tólf manns og þá er verið að rannsaka tölvu Arturs og farsímagögn.