Flugumferðarstjórar boða til vinnustöðvana

Félag íslenskra flugumferðarstjóra hefur boðað tuttugu stuttar vinnustöðvanir dagana 27. júní til 20. júlí næstkomandi. Verkfallsboðunin nær til allra starfandi flugumferðarstjóra í landinu hjá Flugmálastjórn Íslands, Flugmálastjórn á Keflavíkurflugvelli og hjá Flugstoðum. Þetta segir í fréttatilkynningu frá Félagi íslenskra flugumferðastjóra.

Stjórn og trúnaðarráð Félags íslenskra flugumferðarstjóra gerðu tillögu um tuttugu sjálfstæðar fjögurra klukkustunda vinnustöðvanir og voru þær samþykktar í almennri leynilegri atkvæðagreiðslu sem fór fram meðal flugumferðarstjóra dagana 9.til 10. júní síðastliðin.

„Þær takmörkuðu aðgerðir sem nú er gripið til eiga sér langan aðdraganda en með þeim freistar Félag íslenskra flugumferðarstjóra þess að þrýsta á stjórnvöld/Flugstoðir að hrinda í framkvæmd tillögum sem svokölluð réttarstöðunefnd á vegum ríkisstjórnarinnar skilaði 30. júní 1997.

Niðurstaða nefndarinnar var einróma og líta flugumferðarstjórar svo á að hún sé ígildi kjarasamnings. Flugumferðarstjórar telja sig knúna til að beita verkfallsvopni til að knýja á um að tillögur ríkisvaldsins um ráðstafanir sem eiga að tryggja rekstraröryggi flugumferðarþjónustunnar og sem birtast í nefndarálitinu komist til framkvæmda. Sáttatilraunir Ríkissáttasemjara í deilunni hafa til þessa reynst árangurslausar,“ segir í tilkynningu Félags íslenskra flugumferðarstjóra.

Þar segir einnig að flugumferðarstjórar leggi megináherslu á að minnka óhóflegt vinnuálag og leiðrétta kjör flugumferðarstjóra til samræmis við kjör atvinnuflugmanna sem er sú stétt sem nefndin telji hafa samsvarandi ábyrgð og flugumferðarstjórar.

„Flugumferðarstjórum á Íslandi hefur ekki fjölgað í samræmi við aukin umsvif í flugi á íslenska flugstjórnarsvæðinu á undanförnum árum, sem hefur að jafnaði verið 7-8% á ári. Flugumferð um íslenska flugstjórnarsvæðið fyrstu fimm mánuði þessa árs hefur aukist um 13,2% frá því sem var fyrstu fimm mánuði síðasta árs, sem þó var metár. Flugumferðarstjórar hafa alla tíð unnið óhóflega mikla yfirvinnu til að sinna þeirri þjónustu sem íslensk stjórnvöld hafa tekið að sér í flugumferðarstjórn. Nauðsynlegt er því að fjölga flugumferðarstjórum og draga úr yfirvinnu,“ segir einnig í tilkynningunni.

Forsvarsmenn flugumferðarstjóra hafa í vetur og vor fundað með samninganefnd Samtaka atvinnulífsins, sem fer með samningsréttinn fyrir hönd Flugstoða. Segir í tilkynningunni að tillögum sem fram eru settar í réttarstöðunefndarskýrslunni hafi hafnað og SA neitað að semja við flugumferðarstjóra um sambærileg kjör og samtökin hafi samið um við þá stétt í fluggeiranum sem hefur samsvarandi ábyrgð. „Nú stefnir sem sagt enn í röskun á flugumferðarþjónustunni vegna deilna um kjaramál þrátt fyrir að fyrir liggi fyrirvaralausar tillögur fjármála-, samgöngu- og utanríkisráðuneytis, Flugmálastjórnar og Félags íslenskra flugumferðarstjóra um leiðir til að koma í veg fyrir að slíkt ástand skapist,“ segir Félag íslenskra flugumfarðarstjóra.