Ástand golfvalla talið gott eftir veturinn

Um 300 manns voru skráðir í golfmót um allt fyrir helgina, en hráslagalegt veður varð til þess að fresta þurfti flestum mótunum. Sigurður Elvar Þórólfsson, upplýsingafulltrúi Golfsambands Íslands, segir að ástand golfvalla virðist vera gott eftir veturinn. „Miðað við hvernig þetta var í fyrra þá er miklu meiri bjartsýni sem ríkir í golfinu,“ segir hann.

Sigurður Elvar segir að lítið hafi orðið úr þeim mótum sem fyrirhuguð voru um páskahelgina. „Það var mót í gær (í fyrradag) á Hellishólum en annars fór þetta allt í kuldabola,“ segir Sigurður. Eitthvað hafi verið spilar í Sandgerði en helgin hafi ekki farið eins og búist var við.

Sigurður Elvar segir að það séu klúbbarnir út við suðvesturströndina sem fari fyrst í gang með golfmótin og vísar einkum til klúbbanna í Sandgerði og Keflavík. „Þetta eru „spontant“ ákvarðanir sem klúbbar á suðvesturhorninu taka,“ segir hann. „En það opnar ekkert hér í Reykjavík eða við þessa stóru velli fyrr en eftir einhverjar vikur,“ segir Sigurður Elvar og bætir við að menn fari þá í gang í apríl eða byrjun maí.

Sigurður Elvar segir að það sé dágóður hópur sem hafi lagt land undir fót undanfarna daga til þess að fá golfþörfinni svalað. „Það eru fleiri hundruð manns núna út um allt á Spáni og í Portúgal að æfa sig yfir páskahátíðina,“ segir hann.

Þá segir Sigurður Elvar að mikill fjöldi fólks sé hér heima að æfa sig fyrir sumarið. Hann var sjálfur staddur á æfingasvæðinu í Hraunkoti í Hafnarfirði þegar blaðamaður náði tali af honum í gær. „Hérna er allt fullt af fólki að slá golfbolta úti á æfingasvæði. Hérna eru golfhermar og þetta er allt upppantað. Þetta er bara blússandi,“ segir Sigurður Elvar og bendir á að þarna séu púttsvæði og tveir golfhermar sem mikil ásókn sé í.

Opnunartímar golfvalla hafa lengst á undanförnum árum. Haukur Örn Birgisson, forseti Golfsambands Íslands, sagði í samtali við Markaðinn, fylgiblað Fréttablaðsins, í janúar að golfvellir á Íslandi hefðu tekið miklum breytingum. Meðal annars vegna þess að miklum peningum væri varið í rannsóknir á golfvöllum og að golfvallarstarfsmenn væru betur menntaðir. „Tímabilið hefur lengst alveg gríðarlega, sem er þessari þekkingu að þakka,“ sagði Haukur Örn þá. 

Fréttin birtist fyrst í Fréttablaðinu 29. mars.