Frumvarpið snúist ekki um Ríkisútvarpið

Sú gagnrýni sem fram kom í umræðum um fjölmiðlafrumvarp mennta- og menningarmálaráðherra í fyrstu umræðu um málið á Alþingi í gærkvöldi snéri einna helst að því að ekki væri samhliða reynt að stemma stigu við því mikla samkeppnisforskoti sem RÚV hafi á fjölmiðlamarkaði. Lilja Alfreðsdóttir, mennta- og menningarmálaráðherra svarar þeirri gagnrýni á þá leið að frumvarpið fjalli einfaldlega ekki um Ríkisútvarpið, heldur einkarekna fjölmiðla.

Þingmenn Sjálfstæðisflokksins, Miðflokksins og Flokks fólksins voru meðal þeirra sem í gær lýstu þeim skoðunum sínum að þeim þætti eðlilegra að draga til dæmis úr umfangi RÚV á auglýsingamarkaði, áður en farið verður í beinar endurgreiðslur til einkarekinna fjölmiðla.

Sjá einnig: Ræddu fjölmiðlafrumvarpið fram á nótt

„Við erum kannski að einhverju leyti í svipuðum sporum og læknirinn sem horfir á sjúklinginn og á um tvennt að velja. Hann getur skorið meinið í burt og komið sjúklingnum til heilbrigðis eða gefið honum verkjalyfi í þeirri von að honum líði eitthvað betur en síðan auðvitað mun verkun verkjalyfins líða hjá,“ sagði Óli Björn Kárason, þingmaður Sjálfstæðisflokksins, til að mynda í umræðu um málið á Alþingi í gær. Ætla má að meinið í þessari líkingu Óla Bjarnar vísi til samkeppnisforskots Ríkisútvarpsins og lyfjagjöfin til ríkisstuðnings við einkarekna fjölmiðla. Ítrekaði hann þó að honum þætti góður hugur liggja að baki frumvarpinu.

„Þetta frumvarp fjallar um einkarekna fjölmiðla, við fjöllum svo um málefni RÚV í þjónustusamningi og það eru ákveðin lög sem fjalla líka um hlutverk RÚV. Ég bind hins vegar vonir við það að þetta frumvarp um einkarekna fjölmiðla, það er að segja stuðningur við þá, er einn liður í því að styrkja stöðu íslenskra fjölmiðla,“ segir Lilja, spurð út í þessa gagnrýni sem fram kom í máli Óla Bjarnar og annarra þingmanna í umræðu um málið í gær.

Frumvarpinu hefur nú verið vísað til allsherjar- og menntamálanefndar sem fundaði um málið strax í morgun að sögn Páls Magnússonar, formanns nefndarinnar. Stefnt er að því að senda málið út strax í dag til umsagnar en óskað verður sérstaklega eftir umsögnum frá þeim aðilum sem málið varðar með einum eða öðrum hætti. Öllum er þó frjálst að senda inn umsögn. Gert er ráð fyrir að umsagnarfrestur verði til 10. janúar að sögn Páls.