Hyggst vinna sína vinnu áfram

Halldóra Mogensen, þingmaður Pírata, innti eftir viðbröðgum Kristjáns Þórs Júlíussonar, sjávarútvegs og landbúnaðarráðherra, við þeim kröfum sem mótmælendur höfðu uppi á útifundinum sem fram fór á Austurvelli um helgina vegna Samherjamálsins. Þar kröfðust mótmælendur þess meðal annars að Kristján Þór myndi segja af sér og ítrekuðu kröfu um nýja stjórnarskrá með sérstöku auðlindaákvæði.

Sjá einnig: „Metnaður og samkennd er það sem við þurfum“

„Viðbrögð mín við fundinum eru engin sérstök að öðru leyti heldur en því að ég hyggst einfaldlega vinna mína vinnu með sama hætti eins og ég hef gert, sinna mínu pólitíska starfi sem og embættisskyldum í ráðuneytinu með nákvæmlega sama hætti og af bestu samvisku,“ svaraði Kristján Þór. Hann muni áfram gæta að hæfi, hvort heldur sem um er að ræða sérstök mál eða annað. „Og leggja mig bara einfaldlega fram um að sinna þeim verkum sem mér hefur verið treyst og trúað fyrir. Það eru viðbrögð mín við þessum fundi,“ sagði Kristján Þór.

Í síðari fyrirspurn spurði Halldóra hvað þyrfti þá eiginlega til svo að hann myndi íhuga að segja af sér. Vísaði hún til þess að yfir fjögur þúsund manns hafi sótt útifundinn á laugardaginn. „Hversu margir þurfa að lýsa yfir vantrausti á ráðherra til þess að afstaða hans breytist?“ spurði Halldóra.

Kristján Þór svaraði því til að hann hefði engan sérstakan mælikvarða á það. „Ég finn bæði fyrir trausti og vantrausti eins og við stjórnmálamenn gerum iðulega,“ sagði Kristján Þór. Störf stjórnmálamanna séu í eðli sínu umdeild. „Við leggjum verk okkar í dóm kjósenda oftast nær á fjögurra ára fresti. Ég treysti mér fyllilega til þess að standa undir því trausti sem mér hefur verið sýnt til að gegna störfum fyrir Norðausturkjördæmi en um leið taka þátt í störfum Alþingis fyrir alla landsmenn,“ sagði Kristján Þór.