Innlent

Stormviðvörun og hríð

Stefán Ó. Jónsson skrifar
Gular viðvaranir taka gildi í hádeginu fyrir stóran hluta landsins í dag.
Gular viðvaranir taka gildi í hádeginu fyrir stóran hluta landsins í dag. Vísir/vilhelm

Hvassviðri og hríðarveður setja svip á veðurkortin í dag. Gular veðurviðvaranir, frá Vestfjörðum um norðanvert landið og að Suðausturhorninu, taka gildi um hádegi og eru vegfarendur hvattir til að haga ferðum sínum eftir aðstæðum.

Að sögn Veðurstofunnar má búast við norðvestan hvassviðri og má ætla að vindurinn fari víða í 18 til 25 metra á sekúndu. Varað er við vindhviðum við fjöll, sérstaklega í Öræfasveit, og geta því akstursskilyrði víða verið varhugaverð.

Þessu hvassviðri mun fylgja éljagangur og jafnvel snjókoma á norðanverðu landinu. Ætla má að fyrst verði vart við slyddu í byggð en eftir því sem líður á daginn mun kólna og má þá búast við hálku. Fólk sem á leið um fjallvegi nyrðra ætti að hafa varann á því Veðurstofan gerir þar ráð fyrir skafrenningi og litlu skyggni. Holtavörðuheiðin gæti jafnvel orðið varhugaverð.

Ekki er að sjá miklar breytingar næstu daga, í grófum dráttum köld norðan- eða norðaustanátt með éljum á norðanverðu landinu, en bjartviðri syðra. Hitinn verður á bilinu 3 til 9 stig í dag en í kringum frostmark á morgun.

Veðurhorfur á landinu næstu daga

Á þriðjudag og miðvikudag:
Norðaustanátt, yfirleitt 10-15 m/s. Él um landið N-vert, annars bjart köflum, en líkur á éljum um tíma allra syðst. Frost 0 til 8 stig, en nærri frostmarki við suðurströndina.

Á fimmtudag:
Stíf norðanátt og snjókoma eða él, en yfirleitt þurrt og bjart syðra. Frost 0 til 7 stig, en um frostmark við sjávarsíðuna.

Á föstudag:
Minnkandi norðanátt og dálítil él NA-lands, en léttir til í öðrum landshlutum og kólnar í veðri.

Á laugardag (fyrsti vetrardagur):
Útlit fyrir hæga vinda og bjartviðri í flestum landshlutum, en áfram kalt í veðri.

Á sunnudag:
Gengur líklega í hvassa austanátt með snjókomu eða slyddu SA til á landinu og hlýnar heldur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.