Umferðarslys nærri Þrengslum
Sjúkraflutningamenn frá Selfossi og Reykjavík auk tækjabíls frá Slökkviliði höfuðborgarsvæðisins og lögreglu sinna nú útkalli nærri Þrengslaafleggjara en tilkynnt var um að þar hefði bíll farið út af veginum.
Samkvæmt upplýsingum frá Slökkviliði höfuðborgarsvæðisins hafa þrír sjúkrabílar verið sendir á vettvang, tveir frá Selfossi og einn frá Reykjavík auk tækjabíls.
Ekki liggur fyrir hversu alvarleg meiðsli eru á fólki en samkvæmt upplýsingum eru allir þeir sem í bílnum voru komnir út.
Nokkuð kalt er á þeim slóðum þar sem slysið varð. Um fjögurra stiga frost og því líkur á að hálka geti myndast. Tildrög slyssins liggja ekki fyrir.
Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
