Menning

Örkin er efni í stórmynd

Gunnþóra Gunnarsdóttir skrifar
Ómar valdi að hætta sem fréttamaður 67 ára og gerast aðgerðasinni.
Ómar valdi að hætta sem fréttamaður 67 ára og gerast aðgerðasinni. Mynd/Riff

Alþjóðlega kvikmyndahátíðin RIFF heiðraði Ómar Ragnarsson fyrir ævistarf sitt við kvikmyndun á náttúru landsins og veitti honum heiðursverðlaunin Græna lundann. Guðmundur Ingi umhverfisráðherra afhenti verðlaunin í Norræna húsinu. Þar var líka opnuð ljósmyndasýningin Enginn veit hvað átt hefur fyrr en misst hefur, sem er samstarfsverkefni Ólafs Sveinssonar kvikmyndagerðarmanns og Landverndar.

Ómar hefur alloft fengið verðlaun áður fyrir náttúrumyndir sínar. Á alþjóðlegu kvikmyndahátíðinni í Canavese á Ítalíu 2004 voru tvenn aðalverðlaun veitt. Hann hlaut önnur þeirra fyrir mynd sína In Memorial sem fjallar um Kárahnjúkavirkjun. BBC fékk hin fyrir mynd um ána Níl. „Þá fann maður til smæðar sinnar, því aðstöðumunurinn var mikill,“ segir Ómar þegar hann rifjar þetta upp.

Árið 2006 hætti Ómar sem fréttamaður. „Ríkisútvarpið var gert að hlutafélagi og það stóð þannig á skrefinu hjá mér að ég var að verða 67 ára. Svo ég notaði tækifærið og valdi að gerast frekar aðgerðasinni. Mitt mat var að ég mundi gera meira gagn þannig. Það var líka alltaf verið að klaga mig fyrir útvarpsráði. Ég hætti 21. september og fimm dögum seinna var farin mótmælaganga vegna Kárahnjúka.“

Ómar safnaði efni í mynd sem hefur vinnuheitið Örkin, því svo hét bátur sem hann notaði mikið þegar lónið var að myndast. „Ég veit ekki til að nokkurs staðar í heiminum hafi það verið myndað frá viku til viku – jafnvel frá degi til dags – þegar jafnstórt land og Hvalfjörður er að sökkva. Örkin átti að vera fullkomin mynd um svæðið, svo er hvorki peningur né tími til að vinna hana og kannski verður hún aldrei að veruleika. En myndefnið er til.“

Spurður að lokum hvernig hann hafi það svarar Ómar: „Ég segi eins og karlinn sem var talað við í lok myndarinnar Hvellur og átti skammt eftir ólifað. „Ég hef það eins gott og ég get ætlast til.““



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.