Ragnheiður og Búi Steinn voru fyrst með 100 kílómetrana
Búi Steinn Kárason og Ragnheiður Sveinbjörnsdóttir sigruðu Hengilshlaupið 2019, hundrað kílómetra utanvegahlaup sem hófst í gærkvöldi. Búi Steinn kom í mark á 15:00:28 og Ragnheiður á 15:25:32.
Hlaupið átti að hefjast á föstudagskvöld en því var frestað um sólarhring vegna mikillar úrkomu og vinda á keppnissvæðinu. Skipuleggjendur mátu það sem svo á föstudag að ekki væri hægt að tryggja öryggi keppenda nema með því að fresta hlaupinu.
Keppendur fóru því af stað í gærkvöldi klukkan 20. Keppendur í 50 kílómetra keppninni hlupu svo af stað hálfum sólarhring síðar, eða klukkan 8 í morgun.
Keppendur frá átján löndum voru skráðir til leiks, frá Bandaríkjunum, Kanada, Nýja Sjálandi, Belgíu, Hong Kong, Pólandi, Frakklandi, Sviss, Þýskalandi, Svíþjóð, Litháen, Hollandi, Slóveníu, Finnlandi, Noregi, Rúmeníu, Slóvakíu og auðvitað Íslandi.
Tengdar fréttir
Hengilshlaupið hófst í kvöld sólarhring á eftir áætlun
Hengill Ultra Trail er lengsta utanvegahlaup á Íslandi og er nú haldið áttunda árið í röð. Hlaupið er frá Skyrgerðinni í Hveragerði, upp Reykjadal að Ölkelduhnjúki og í kring um hann.
Hengilshlaupinu frestað vegna veðurs
Hengils Ultra hlaupinu hefur verið frestað þar til í kvöld vegna veðurs.
