Innlent

Óskar þjarmar óþyrmilega að þingmönnum Sjálfstæðisflokksins

Jakob Bjarnar skrifar
Ásmundur, Birgir og Guðlaugur Þór áttu í vök að verjast á fundi sem haldinn var á Hellu. Óskar gaf þeim engin grið.
Ásmundur, Birgir og Guðlaugur Þór áttu í vök að verjast á fundi sem haldinn var á Hellu. Óskar gaf þeim engin grið.

Eins og Vísir hefur greint ítarlega frá ólgar og kraumar innan Sjálfstæðisflokksins vegna orkupakkamálsins. Sjálfstæðisflokkurinn hefur skipulagt fundarherferð um landið þar sem þingmenn ríða um héruð og vilja tala menn inná stefnu flokksins og ríkisstjórnarinnar í málinu. Og að þeir láti að einarðri andstöðu. Málið er óþægilegt Sjálfstæðisflokknum svo vægt sé til orða tekið en til stendur að afgreiða það nú í haust eftir að efnt hefur verið til svokallaðs „stubbs“, sérþings að kröfu Miðflokksins þar sem málið verður rætt áfram enn og aftur.

Ef marka má hitafund sem haldinn var á Hellu nú á föstudag er málið ekki í rénun nema síður sé. Sem þýðir þá að vandi Sjálfstæðisflokksins er verulegur. Guðlaugur Þór Þórðarson utanríkisráðherra var þar á fundi ásamt þingmönnum flokksins þeim Birgi Ármannssyni og Ásmundi Friðrikssyni. Samkvæmt heimildum Vísis áttu þeir mjög undir högg að sækja á fundinum og var Óskar Magnússon bóndi, rithöfundur og athafnamaður nefndur sérstaklega til sögunnar en hann á að sögn að hafa lagt þá þingmenn á kné sér og veitt þeim ráðningu.

Menn lamdir í hausinn með hafnarboltakylfu

Vísir heyrði í Óskari vegna fundarins og hann segir það rétt að mikill hiti sé í þessu orkupakkamáli.

„Við sveitamenn sem erum ekki miklir ESB-menn. Við mættum þarna án þess að það væri nein sérstök smölun og var fullt hús 50 manns,“ segir Óskar sem kvaddi sér umsvifalaust hljóðs og dró þingmenn sundur og saman samblandi af háði og skömmum.

„Ég fór bara yfir þetta. Ég er ekki mikill stjórnmálamaður. Ég er fótgönguliði. En mér og fleirum hefur blöskrað,“ segir Óskar og vísar til þess hvernig flokksforystan hefur haldið á málum. Hann segir það einkum tvennt sem stendur í mönnum.

„Annars vegar er maður með ágreining við þessa ágætu menn sem er orkupakkinn, það er lögfræðin í því,“ segir Óskar og tekur fram að hann geti ekki fullyrt með hundrað prósenta vissu að hans áhyggjur séu réttmætar. En, það geti þeir hins vegar ekki heldur, að þeirra skoðun á málinu sé sú eina rétta sem standist upp á punkt og prik.

Óskar segir bændur almennt ekki mikla ESB-menn. En, þingmenn fengu það óþvegið á fundi á Hellu nú skömmu fyrir síðustu helgi. Óskar sá um að þjarma að þeim. visir/eyþór

„Þarna er djúpstæður ágreiningur milli fræðimenna og ég vil að menn „aksepteri“ það. Ekkert er skrítið að við aðstæður sem þessar að þá skiptist flokkur eins og Sjálfstæðisflokkurinn í fylkingar. Sama hvert málefnið er en það er þá hlutverk forystumanna flokksins, með sínu umburðarlyndi, lagni og stjórnvisku að sætta þessi sjónarmið. En ekki berja menn í hausinn með hafnarboltakylfu, eins og ég sagði á fundinum.“

Ekki hálmstrá rétt út til sátta

Óskar kvartar undan því að ekki votti fyrir neinu sem túlka megi sem vísi að sáttarhönd í þessu máli.

„Menn munu þiggja frá sínum góða flokki nánast hvert hálmstrá sem getur orðið til að menn haldi áfram sínum stuðningi.“

Málið er þannig í hnút. Á fundinum gat Óskar ekki stillt sig um að atast í þingmönnunum með að hæðast að því að Dr. Carl Baudenbacher, erlendur aðili sem fenginn var til verksins hafi fengið 8,4 milljónir fyrir sína ráðgjöf í málinu.

„Guðlaugur Þór segist hafa eytt þessu í þennan fína, gráhærða og feita karl sem birtist með stærsta vasaklút sem sést hefur í nokkrum jakkafatavasa,“ segir Óskar en fundarmenn hlógu eins og vitleysingar að þessum lýsingum hans á því hvernig að þessu var staðið: „Hvað er að marka álit utan úr heimi sem borgaðar eru aðrar eins upphæðir fyrir?“
 

Góð fundarsókn til marks um mikinn hita

Á fundinum voru að sögn Óskars allskonar menn, bændur úr Rangárþingi sem mættu og sátu í tvo og hálfan tíma, í glampandi sól yfir hábjargræðistímann. Það megi vera til marks um hitann í málinu. Og flestir ef ekki allir voru þeir afar ósáttir við þróun mála. Hálft hundrað manna. Og þeir eru sárir með fylgi flokksins sem nú mælist enn á ný um 19 prósent; það vilja menn rekja beint til þessa máls.

„Þetta sem góðir og gegnir Sjálfstæðismenn sem eru í sárum yfir þessu. En, þeim er ekki viðbjargandi blessuðum forystumönnunum,“ segir Óskar og vísar enn til þess að ekkert komi frá forystunni sem menn geta sætt sig við. Og það þyrfti ekki að vera mikið.

Ásmundur var meðal fundamanna og á tímabili töldu fundarmenn að hann væri kominn á þeirra band, en hann snéri sér, að sögn Óskars, þá að því að vilja klappa fyrir Guðlaugi Þór. visir/vilhelm

„Jájá, ég er enn í flokknum og hef ekkert í hyggju að segja mig úr honum. Ég hef sagt frá því að að ég byrjaði sex ára í flokknum og var þá að ydda blýanta á flokksskrifstofunni. En, það er ekki víst að það verði gaman í flokknum,“ segir Óskar ef þeir einir verða eftir sem eru af slíku bergi brotnir.

Þingmennirnir vildu fara í aðra sálma

Óskar telur ekki að um fjöldaflótta sé að ræða úr flokknum. Ekki að sinni.

„Ég held ekki. Líklegra að hver og einn muni með sjálfum sér sleppa því að þessu sinni að setja x við D í kjörklefanum án þess að tala um það. Þetta er það langhættulegasta og við erum að sjá vísbendingar um slíkt í skoðanakönnunum.“

Eins og Vísir hefur greint frá hefur Bolli Kristinsson athafnamaður, sem hefur í gegnum tíðina leikið stórt hlutverk í fjáröflunarstarfi flokksins og fleiri menn sagt sig úr flokknum. Óskar telur að þeir vilji gjarnan koma til baka en það verði að vera fær leið heim.

Óskar er þakklátur Morgunblaðinu að hafa tekið einarða afstöðu gegn orkupakkanum en telur þó að þar hafi menn ferið fram úr sér og gert illt verra.

Óskar segir þingmennina ekki hafa haft neitt fram að færa í þeim efnum á fundinum. Þeir hafi farið yfir víðan völl en eins og oft sé á fundum þegar erfið mál eru undir, þá vilji menn tala um eitthvað allt annað. Það hafi verið þarna.

Mogginn gerir illt verra

Vísir hefur einnig greint frá einörðum skoðunum sem birst hafa í leiðaraskrifum Morgunblaðsins, en Óskar Magnússon var einmitt stjórnarformaður Árvakurs útgáfufélags blaðsins og réði Davíð Oddsson hinn harðorða ritstjóra til starfa. Helst er á Óskari að skilja að honum þyki skrif blaðsins ekki verið til að bæta úr skák.

„Morgunblaðið sem er andstæðingur orkupakka 3, en blaðið hefur samt farið fram úr sér. og gengið fram af okkur sumum. Mönnum þykir nóg um, þeir vilja ekki láta rassskella formann flokksins opinberlega með orðbragði. Þó við kunnum að meta það að Morgunblaðið styðji málið er slíkt ekki gott og hjálpar ekki andstæðingum orkupakkans.“

Óskar telur einsýnt að forystan muni keyra málið í gegn. Þeir muni líklega klastra einhverju þjóðaratkvæðaákvæði inn í málið um lagningu sæstrengs í von um að það verði til að lægja öldur. En, Óskar telur lítið hald í slíku.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.