Kölluðu til lögreglu vegna grænkera sem spiluðu dýrahljóð í matvöruverslun

Starfsfólk í matvöruverslun í Reykjavík óskaði eftir aðstoð lögreglu vegna mótmæla grænkera gegn dýraáti. Erlendir aðgerðasinnar gegn kjötáti segjast hafa spilað þjáningahljóð úr dýrum í kjöt- og mjólkurvörudeildum stórmarkaða í Reykjavík í gær.

Í dagbók lögreglunnar á höfuðborgarsvæðinu kemur fram að hópur fólks, líklega mótmælenda, hafi verið með læti og gefið frá sér ýmis dýrahljóð í matvöruverslun í hverfi 108. Lögreglumenn hafi ekki haft afskipti af fólkinu þar sem það hafi yfirgefið verslunina fljótlega.

Fréttablaðið sagði frá því í gærkvöldi að erlendu aðgerðasinnarnir Natasha Katherine Cuculovski og Luca Padalini hafi staðið fyrir friðsamlegum mótmælum í Hagkaupum í Skeifunni í gærkvöldi. Þau kalla sig „Þetta grænkerapar“ [e. That vegan couple] á samfélagsmiðlum.

Í færslu á Facebook-síðu parsins segjast þau hafa staðið fyrir fyrstu mótmælum sínum á Íslandi í gær og birta myndband sem virðist tekið í og við Hagkaup í Skeifunni. Þau hafi spilað dýrahljóð í kjöt- og mjólkurvörudeildinni.

Í myndbandinu má sjá hóp fólks með mótmælaspjöld og límt fyrir munninn inni í versluninni. Karlmaður, sem virðist vera Padalini, heldur þar á litlum hátalara og leikur hljóð sem virðast vera úr ýmis konar húsdýrum.