Körfubolti

Tékkarnir of sterkir og strákarnir spila um 5. til 8. sæti

Óskar Ófeigur Jónsson skrifar
Hilmar Smári Henningsson skoraði 19 stig, tók 11 fráköst, gaf 5 stoðsendingar og stal 3 boltum í leiknum við Tékka. Það dugði því miður ekki til.
Hilmar Smári Henningsson skoraði 19 stig, tók 11 fráköst, gaf 5 stoðsendingar og stal 3 boltum í leiknum við Tékka. Það dugði því miður ekki til. Mynd/FIBA

Íslenska tuttugu ára landslið karla í körfubolta tapaði með tíu stigum á móti Tékklandi, 77-67, í dag í átta liða úrslitum b-deildar Evrópukeppninnar sem fer fram í Portúgal.

Íslenska liðið hafði tryggt sér sæti í átta liða úrslitunum með mögnuðum stórsigri á Ungverjum í lokaleik riðlakeppninnar en Tékkarnir voru of sterkir í þessum leik í dag.

Bjarni Guðmann Jónsson var stigahæstur hjá íslenska liðinu með 20 stig, 6 fráköst og 3 stolna bolta, Hilmar Smári Henningsson skoraði 19 stig, tók 11 fráköst, gaf 5 stoðsendingar og stal 3 boltum og þá var Hilmar Pétursson með 11 stig, 8 fráköst og 9 stoðsendingar.

Íslensku strákarnir mæta annaðhvort Hollandi eða Belgíu á morgun en þar er spilað um sæti í leiknum um fimmta sætið.

Íslensku strákarnir byrjuðu leikinn vel og voru með forystuna nær allan fyrsta leikhlutann. Tékkar komust reyndar yfir í 15-13 en því svöruðu íslensku strákarnir með því að skora sex síðustu stig fyrsta leikhlutans.

Orri Hilmarsson og Hilmar Smári Henningsson enduðu fyrsta leikhlutann á sitthvorum þristinum og íslenska liðið var 19-15 yfir eftir fyrstu tíu mínútur leiksins.

Íslenska liði skoraði ekki fyrstu þrjár mínútur annars leikhluta og Tékkar náðu frumkvæðinu. Leikurinn hélst þó jafn og Hilmar Smári endaði hálfleikinn með því að jafna metin í 34-34 með sirkuskörfu eftir stoðsendingu frá nafna sínum Hilmari Péturssyni.

Hilmar var stigahæstu í fyrri hálfleik með 11 stig en aðeins fjórir leikmenn skoruðu fyrir íslenska liðið í hálfleiknum. Orri Hilmarsson og Bjarni Guðmann Jónsson voru með átta stig og Hilmar Pétursson með sjö stig.

Tékkar byrjuðu seinni hálfleikinn mjög vel, unnu fyrstu fjórar mínúturnar 15-5 og komust stíu stigum yfir, 49-39. Ágúst Björgvinsson tók leikhlé í stöðunni 50-39 og tókst að vekja sína menn því þeir náðu að minna muninn aftur niður í tvö stig, 52-50. Það munaði hins vegar aftur sjö stigum á liðunum fyrir lokaleikhlutann, 59-52.

Tékkar skoruðu síðan fimm fyrstu stig fjórða leikhluta og voru í frábærum málum enda tólf stigum yfir. Íslensku strákarnir gáfust ekki upp og náði muninum aftur niður í fimm stig en nær komust þeir ekki.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.