Innlent

„Enginn sagði mér að utanvegaakstur væri ólöglegur“

Tryggvi Páll Tryggvason skrifar
Ferðamaðurinn er þekktur á samfélagsmiðlum, þá helst Instagram, en nafn hans er Alexander Tikhomirov.
Ferðamaðurinn er þekktur á samfélagsmiðlum, þá helst Instagram, en nafn hans er Alexander Tikhomirov. Instagram

Rússneski ferðamaðurinn sem gerðist sekur um utanvegaakstur við Bjarnarflag í Mývatnssveit um helgina hefur tjáð sig um athæfið. Hann segist ekki hafa gert sér grein fyrir að utanvegaakstur væri ólöglegur á Íslandi, hópur hans hafi orðið fyrir aðkasti vegna málsins auk þess sem að hann gagnrýnir þá sem farið hafa hörðum orðum um hann á samfélagsmiðlum vegna málsins.

Ferðamaðurinn sem um ræðir er þekktur á samfélagsmiðlum, þá helst Instagram, en nafn hans er Alexander Tikhomirov. Pikkfesti hann Toyota Land Cruiser sem hann var með á leigu á jarðhitasvæði í grennd við Jarðböðin í Mývatnssveit. Föruneyti hans myndaði eftirköst utanvegaaksturins í bak og fyrir og birti á samfélagsmiðlum og ekki voru mikil ummerki um eftirsjá, ef marka má myndirnar.

Í gær mætti Tikhomirov á lögreglustöðina á Akureyri þar sem hann var sektaður um 450 þúsund krónur. Rússinn hefur verið harðlega gagnrýndur vegna akstursins, meðal annars af landeigendum sem munu væntanlega sitja uppi með kostnaðinn við að lagfæra skemmdirnar.

Tikhomirov tjáði sig á Instagram um málið. Mynd/Alexander Tikhomirov

Þá hefur hann fengið kaldar kveðjur frá Íslendingum í gegnum Instagram-reikning sinn þar sem hann honum er tilkynnt að hann sé ekki lengur velkominn á Íslandi og hann beðinn um að koma aldrei aftur í Mývatnssveit. 

Plastflöskum kastað í föruneytið á ferð

Það er einmitt á Instagram þar sem hann tjáir sig um málið og þar reynir hann að útskýra sína hlið á málinu.

„Enginn sagði mér að utanvegaakstur væri ólöglegur,“ skrifar Tikhomirov og bætir við að hann hafi séð mörg hjólför við hliðina á veginum. Þá hafi enginn merki verið til staðar sem banni utanvegakstur.

Hann hafi ætlað sér að ná myndum af bílnum í þokunni sem var til staðar en ekki áttað sig á því hversu laus í sér jarðvegurinn væri. Því hafi hann fest bílinn. Segist hann hafa lent í miklum vandræðum vegna málsins af hálfu lögreglu, bílaleigunnar og landeiganda og hann hafi þegar greitt háa sekt vegna málsins en gerð hafi verið krafa um hærri greiðslu.

Þar á hann líklega við kröfu landeiganda sem gert hafa tveggja milljóna króna fjárkröfu á hendur Tikhomirov vegna skemmdanna.

„Síðan áttuðu einhverjir heimamenn sig á því hver við værum og hentu plastflöskum í bílinn okkar á meðan við vorum að keyra. Væntanlega telja þeir að plastið sé betra fyrir náttúruna,“ skrifar Tikhomirov.

„Ég tel ykkur vera óargardýrin“

Sem fyrr segir hefur fjöldi manns gagnrýnt athæfi mannsins en rúmlega tvö þúsund athugasemdir hafa verið skrifaðar við myndina sem hann deildi á Instagram af sér við bílinn. Flestar athugasemdirnar snúa að því að hann sé ekki lengur velkominn á Íslandi auk þess sem að margir biðja Instagram um að fjarlægja myndina þar sem hún sýni ólöglegt athæfi.

Svo virðist sem að hann hafi einnig fengið öllu alvarlegri athugasemdir, ef marka má orð Tikhomirov á Instagram.

„Ykkur finnst ég vera óargardýrið? Ég tel ykkur vera óargardýrin. Hver gerir svona, hver óskar þess að við deyjum í flugferðinni eða þvíumlíkt?“ spyr hann að lokum á Instagram.


Tengdar fréttir

Verði öðrum vonandi víti til varnaðar

Landeigandi Reykjahlíðar kallar eftir því að yfirvöld breyti lagaumhverfi í kringum utanvegaakstur eftir að rússnesk samfélagsmiðlastjarna ók út á jarðhitasvæði. Viðvörunarbjöllur hringja hjá Umhverfisstofnun vegna málsins.

Staðgreiddi 450 þúsund króna sekt vegna utanvegaaksturs

Rússneska samfélagsmiðlastjarnan sem gripin var við utanvegaakstur í grennd við Jarðböðin í Mývatnssveit var sektuð um 450 þúsund krónur. Sektin var staðgreidd á lögreglustöðinni á Akureyri fyrr í dag.

Insta­gram­stjörnur göntuðust með utan­vega­akstur við Mý­vatn

Lögreglumenn frá Húsavík höfðu í dag afskipti af ökumanni bifreiðar sem ekið hafði verið utan vegar í Bjarnarflagi við Mývatn. Lögreglan á Norðurlandi eystra staðfestir í samtali við Vísi að ökumaður bílsins og farþegar hafi verið boðaðir til móts við lögreglu á morgun til að ganga frá málinu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.